CEBU, Philippines - Maayo kaayong nakaduwa si Kevin Durant diin mipadahunog siya'g 33 puntos, milangkat og 13 ka rebounds uban ang lima ka assists aron maoy mangulo sa Oklahoma City Thunder pagdismantol sa Houston Rockets, 117-86 sa nagpadayong aksiyon sa National Basketball Association kagahapon.
Grabe sab nga nakaduwa si Reggie Jackson isip starter hulip ni Russell Westbook dihang miiskor kini'g 16 puntos lakip ang walo ka assists, samtang si Jeremy Lamb mihimo'g career-high nga 22 puntos uban ang lima ka assists alang sa Thunder.
Ang Oklahoma City mao na karon ang naghupot sa labing maayong rekord sa NBA sa ilang 25-5 nga baraha.
Aduna na sab sila'y 13-1 record sa ilang korte sa Cheasepeake Energy Arena. Bugtong nakapilde kanila mao ang Toronto Raptors niadtong Disyembre 22.
Silang Aaron Brooks ug Chandler Parsons maoy mitimon sa Rockets sa ilang 17 ug 15 puntos matag usa, apan nabaraw ang ilang three-game winning streak.
Ang Thunder nga mihimo'g 57 percent field goals, mipahamtang sa Rockets ngadto sa ilang labing daku nga biya karon nga season.
Gisugdan sa Thunder ang duwa pinaagi sa ilang 13-0 lead, diha na nakaiskor ang Rockets sa jump hook ni Dwight Howard sa oras nga 5:27 sa first quarter.
Gitapos sa Thunder ang first quarter sa ilang 26-14 nga labaw ug miabante sab sila og 10 puntos sa halftime sa iskor nga 56-44.
Napugngan si Howard sa hugot nga depensa ni Kendrick Perkins ug hinungdan nga igo lang kini miiskor og nuybe puntos ug milangkat og siyam ka rebounds.
Ang 14 puntos nga score sa Rockets sa first quarter maoy ilang labing ubos karon nga season.
Wala gihapon makaduwa si Russell Westbrook nga gipailawom kini sa "arthroscopic" knee injury niadtong Biyernes nga maoy iyang ikatulong operasyon sukad niadtong Abril.
Si Westbrook nakaangkon og gisi sa iyang "meniscus" human magkabangga ang ilang tuhod ni Patrick Beverley sa Rockets atol sa Game-2 sa first round sa playoff series.
Tungod sa operasyon, si Westbrook dili pa makaduwa sud sa pipila ka semana.
Sa laing mga duwa, ang Golden State Warriors nakaipsot sa mga kamot sa Cleveland Cavaliers pinaagi sa overtime sa iskor nga 108-104, midaog sab ang Orlando Magic batok sa Atlanta Hawks, 109-102 ug ang San Antonio Spurs mipaluhod sa Sacramento Kings sa iskor nga 112-104.