Accenture, ePerformax nakadaginot og daog pagtapos sa elimination round sa CSCC E-League
CEBU, Philippines - Gitapos sa Accenture Sharks ug ePerformax Reds ang ilang kampanya sa eliminasyon pinaagi sa pagbilin og daog sa 9th CSCC E-League basketball tournament niadtong Sabado didto sa City Sports Club-Cebu gym sa Cebu Business Park.
Ang Accenture mipilde sa Teleperformance sa iskor nga 72-64, samtang ang ePerformax milubong sa 1&1 Marauders, 99-72.
Namugnaw ang Accenture human milabaw og 22-14, apan mibalik ang ilang kainit sa third period aron moposte'g 53-42 nga bentaha sa katapusang 10 minutos sa duwa. Ang Teleperformance wala na makasikit pa sukad niadto.
Si Archie Brian Vincent Batua maoy topscorer alang sa Accenture nga mirehistro og 25 puntos, gisundan ni Jasper Loreto nga miamot og 20 puntos.
Sa laing duwa, ang higanteng si Robert Gilo mipabuto og season-high 27 puntos, samtang laing upat niya ka teammates ang miiskor sab og double figures alang sa ePerformax. (BANAT PALARO)
- Latest
