Rough Dragons nakalingkawas sa Final Thrower

CEBU, Philippines -  Nakalahutay gihapon ang Rough Dragons bisa'g lima lang sila ang mikumbati gikan sa pagsugod hangtod nahuman ang duwa.

 Kaisog ug determinasyon maoy gihimong gabayan sa Rough Dragons pagbihag sa Final Thrower, 47-37 sa 1st Onet  Wood Furniture Sportsfest niadtong Biyernes sa gabii didto sa barangay Pagsabungan gym sa  dakbayan  sa Mandaue.

 Human moposte'g 20-18 sa halftime, ang  Rough Dragons nga naluya na, mipakita sa ilang kabangis hinungdan nga miburot ang ilang labaw ngdto sa 10 puntos, 38-28 sa kombinasyon nilang Jimboy Flores ug Bimboy Ompoy nga parehong mihabwa og double figures. Si Flores mipabuhagay og 18 puntos, samtang si Ompoy mibugwak og 16 puntos alang sa Rough Dragons nga nagtangag karon og 2-2  nga baraha.

 Daku unta'g chance nga makuha sa Final Thrower ang daog dihang sila si Flores ug Ompoy aduna nay tag-upat ka fouls kapin sa tres minutos pa lang ang nahabiling oras sa duwa, apan wala sila makahimo og maayong mga plays hinungdan  nga nakatilaw sila sa ikatulo nilang pilde batok sa usa ka daog.

 Si Walton Wacky mao lang ang bugtong player sa Final Thrower nga miiskor og double figures pinaagi sa iyang 11 puntos.

 Gipasiugdahan ni committee chairman Norman Jimenez, uban nilang Adrian Corbo ug Christel Aljas, ang torneyo mosubay og single round sa elimination round, diin ang top two teams makaangkon og "twice-to-beat" advantage sa semifinals.

 Sa best-of-three semis,ang No. 1 moharong sa No. 4, samtang ang No. 2 makigbatok sa No. 3. (BANAT NEWS)

PUNTOS MATAG USA

 ROUGH DRAGONS (47)  - Flores 18, Ompoy 16, Acaylar 5, Sasan 4, Doria 4

 FINAL THROWER (37) - Wacky 11, Jimenez 9, Caballa 7, Cuesta 6, Rico 2