Lexmark mipahamtang unang pilde sa Wipro sa CSCC E-League

CEBU, Philippines -  Nag-wild ang Lexmark Stallions sa nanghinapos nga bahin sa duwa aron pahamtangan ang Wipro Tigers sa

ilang unang pilde, 71-64 sa  9th CSCC E-League basketball tournament niadtong Sabado didto sa City  Sports Club-

Cebu gym sa Cebu Business Park.
 Si Ralph Loren Martinez mipugnit og 13 puntos, samtang sila si Ian Froi Divinagracia, Niel Tiempo ug

Giovanni Villahermosa mikudlit og 12 puntos matag usa alang sa Lexmark nga nagsolo  karon sa ikaduhang dapit sa

overall sa Southern Conference uban ang 4-1 win-loss record, sunod sa Accenture Sharks nga nagtangag og 5-1 nga

baraha.
 Nabiyaan ang Lexmark og kuwatro puntos sa third quarter sa iskor nga 45-49, apan nagmangtas sila sa final

period uban ang 26-15 run aron mapukan sa hingpit ang Wipro.
 Ang naparot nga Wipro gipangulohan ni Neptune Carungay, kinsa miantog og 15 puntos, gisundan ni Ernie

Eric Ygot nga midiga og 14 puntos.
 Sa laing aksiyon, ang Teleperformance Lions mikawhat sa labing una nilang daog niini nga season human

makalingkawas sa kulbahinam nga duwa batok sa Sykes Pioneer, 60-55.
 Tulo ka players sa Teleperformance ang mirehistro og double digits nga gipangunahan ni Marco  Antonio Real,

kinsa mipabuhagay og 16 puntos. Si Eugenio  Paming mitikdol og 12 puntos, samtang si Jason Delalamon mitimang og 10

puntos alang sa Teleperformance nga mipakgang sa ilang lima ka sunod-sunod nga kapildihan.
 Si Frederick Montelibano mikadlit og 15 puntos, samtang si  Reggy Sultan  mihirit  og 11 puntos alang sa

Sykes nga nakatilaw sa ikaduha nilang pilde sa lima ka duwa.
 Sa lain pang duwa, ang ePerformax  Reds miiskor sab og daog batok sa 1&1 Marauders sa iskor nga 74-69.
 Ang higanteng si Robert Gilo mikabkab og 18 puntos, samtang si Romel John Ferrero Lawas mikimada og 17 

puntos ug si Floyd Dean Singco mitimbre og 12 puntos alang sa ePerformax nga adunay 2-2 win-loss record.
 Sila si Jan Isiah Gabest ug John Paul  Talan nagkumboya og 30 puntos alang sa 1&1 Marauders nga nagbitbit

og 2-3 nga baraha. (BANAT NEWS)