Lexmark, Aegis miiskor og daog batok sa tagsa-tagsa nilang kaatbang

CEBU, Philippines - Ang Lexmark Stallions ug Aegis Vipers mimakmak sa tagsa-tagsa nilang kaatbang sa 9th CSCC E-League basketball tournament didto sa City Sports Club-Cebu gym sa Cebu Business Park sa miaging semana.

 Si Niel Tiempo mikagis og 15 puntos, samtang laing tulo niya ka teammates ang mikadlit og double figures alang sa Lexmark nga milaparo sa Telstra-Teletech sa iskor nga 73-65, samtang si Ryan Veloso mipaulbo og 19 puntos uban ang pito ka rebounds aron pangulohan ang Aegis ngadto sa 78-52 nga kadaugan batok sa Calltek Trojans.

 Ang Lexmark milansang og 19 puntos sa halftime, 34-15 nga maoy gihimong pundasyon pagposte og otso puntos nga kadaugan.

 Sila si Franco Angelo Cipriano ug Ian Froi Divinagracia mitikdol og 11 puntos matag usa alang sa Lexmark nga nakakuha sab og suporta gikan ni Siegfred Ofondo nga miambit og 10 puntos.

 Bugtong si Clifford Amarado lang ang miiskor og double figures alang sa Telstra-Teletech pinaagi sa iyang 26 puntos.

 Sa laing bahin, si  Veloso nakakuha sab og dakung suporta gikan nilang Rudolfo Enterina III ug Dean Junber Escalon nga nagkumboya og 23 puntos dihang ang Aegis milubong og 26 puntos sa Calltek.

 Usa ka palito lang ang labaw sa Aegis sa first period, 15-14, apan hinay-hinay kining miburot sa mosunod nga mga kuwarter hangtod naangkon ang makabungog nga kadaugan.

 Si Mark Louise Gellez mikutlo og 21 puntos ug si Earl Genebraldo adunay 17 puntos alang sa Calltek.

 Sa main game, si  Archie Brian Vincent Batua mikabkab og 16 puntos uban ang walo ka rebounds ug upat ka assists, samtang sila si Ryan Edward Llanos ug Jasper Loreto nagkumboya og 26 puntos dihang ang Accenture Sharks miiskor og daog batok sa SSI, 63-60.

 Si Lawrence Daven Agas mihimo'g 23 puntos, unom ka rebounds, tulo ka assists ug duha ka steals alang sa SSI nga wala gyud makapukan sa Accenture bisan sa ilang solidong depensa. (BANAT NEWS)

PUNTOS MATAG USA

Unang duwa:

 Lexmark (73) - Tiempo 15, Cipriano 11, Divinagracia 11, Ofonda 10, Armamento 9, Martinez 7, Santillan 3, Torrepalma 2, Villahermosa 2, Quimno 2, Lambo 1

 Tesltra-Teletech (65) - Amarado 26,  Belena 9, Capillanes 8, Ortega 7, Maxilom 6, Alonzo 4, Escuadro 2, Banua 2, Medija 1

Ikaduhang duwa:

 Aegis (78) - Veloso 19, Enterina 12, Escalon 11, Manzanares 6, S.W. Navaja 6, K.C. Navaja 6, Zanoria 4, Palmere 3, Bas 3, Nayon 2, Palasuelo 2, Pastoral 2, Yballe 2

 Calltek (52) - M.L. Gellez 21, Genebraldo 17,  J.P. Gellez 7, Judilla 7

Ikatulong duwa:

 Accenture (63) - Batua 16, Llanos 15, Loreto 11, Saballa 4, Suerte 4, Bulangis 3, Buligan 3, Jumao-as 2, Lachica 2, Masancay 2, Escaner 1

 SSI (60) - Agas 23, Tomakin 12, Poquita 7, Rivera 6, Ardiente 5, Orbe 3, Ator 2, Torreon 2