Hinaut unta dili kunsemisyon ang atong mapaabot sa election

CEBU, Philippines - Karong adlawa, Mayo 13 maoy adlaw sa paghukom. Atong hukman ang atong mga kandidato nga magpapili sa nagkalain-laing position sa kagamhanan ug kita maoy adunay gahum sa pagpili kung kinsa gyud kanila maoy angayan nga mahimong leader sa atong dapit.

Akong naandan nga mga kalamboan unta sa sports o paugnat sa kusog ang mapatik  dinhi sa SPORTSgab matag semana apan dili sab nako kalikayan nga palabyon kining talagsaong higayon kay ang mahimong resulta sa atong piniliay karong adlawa, maka-apekto man sab sa natad sa sports kay duna may mga politiko nga mahiligon sa sports ug mga "sports enthusiasts" mismo.

Gani, dli pa lang dugay, mitingog man si Sen. Pia Cayetano aron pagsaway sa bag-ong two-year residency rule nga gustong ipatuman sa UAAP nga dili kuno makiangayon ngadto sa mga batan-ong players ug kini naghatag lang og  pabor sa tunghaan ug dili sa mga estudyante.

Si Senador Pia usa ka biking ug running enthusiast ug daghang mga politiko sama kaniya nga mahiligon kaayo sa sports sama sa golf, tennis, football, volleyball ug basketball.

Dinhi lang daan sa Sugbo, daghan kaayong mga mayor nga hilig sa basketball ug niadto lang Huwebes, Mayo 9, ang konseho sa lungsod San Remigio ubos sa ilang mayor Jay Olivar, maoy mi-sponsor sa usa ka bearing game sa elimination round sa Enervon CESAFI Partner's Cup.

Matag tuig, adunay pagahimoon nga Gullas Tennis Cup ug Governor's Cup volleyball ug dili sab nato ikalimud nga halos matag tuig--may eleksyon o wala, aduna gyu'y ipahigayon nga Mayor's Cup ug pipila lang kana sa mga kalihokan nga kanunay paga-sponsoran sa mga politiko.

Dalaygon kanang mga politiko nga mahiligon sa sports kay mao kanang matanga sa tawo ang makamao mudawat og kapildehan sama sa usa ka duwa nga dunay modaug ug duna sa'y mapilde.

Andam na akong mobotar karong adlawa ug dugay na nakong gitun-an kung kinsay akong pilion apan dili lang nako isulti dinhi ning maong lindog aron wala'y masilo nga akong mga higala.

 Sa lokal nga mga kandidato, akong hashasan ug maayo kung kinsay akong pilion aron dili mausik ang akong boto.

 Ang akong listahan nga akong botaran pagka senador mao ang mga manok sa Liberal Party, usa sa UNA nga si kanhi senador ug kanhi Tourism Secretary Richard Gordon ug ang Independent candidate nga si Teddy Casiño kay sa akong tan-aw, maayo ang iyang gisangyaw nga idolohiya ilabi na ang pakigbatok sa kurapsyon.

 Mangayo lang ako'g pasaylo sa ubang mga kandidato nga wala nako mauyoni.

Ang segurado sa akong listahan mao si Sen. Antonio Trillanes IV kay siya man maoy presidente sa Basketball Association of the Philippines (BAP), ang labing karaan nga grupo sa basketball ug lakip sa nakakuha sa akong bililhong boto mao si Ana Theresia "Risa" Hontiveros Baraquel kinsang party list nga Akbayan dunay ka-alyansa didto sa Seattle, Washington, USA ug dili man tingali kamo motuo, usa sa leader sa Akbayan-Seattle mao ang akong ig-agaw nga si Cindy Domingo Owens. Gani ania si Cindy (anak sa akong tiya nga si Adelina G. Domingo) dinhi sa Sugbo aron mo-obserbar sa atong piniliay.

Mao kini ang akong listahan sa akong mga kandidato pagka-senador--- Sonny Angara, Alan Peter Cayetano, Bam Aquino, Chiz Escudero, Loren Legarda, Ramon Magsaysay, Jr. ug Koko Pimentel.

Hinaut unta nga wala nay moreklamo nga sila gitikasan. Good Luck to all candidates. To all voters, please vote wisely.

Miscellaneous. Belated Happy Mother's Day to all mothers most especially to my wife Gingging. (BANAT NEWS)