Bullvets' 94, Davies Paints sa BBC Alumni Cup
CEBU, Philippines - Walay kukaluoy nga gilubong sa Bullvets '94 ang DB Greywolves, 80-59 aron maangkon ang katapusang luna sa Bosconian Basketball Club Alumni Cup niadtong Domingo didto sa Don Bosco Technology Center (DBTC) gym sa Punta Princesa, ning siyudad.
Gumikan niini, ang Bullvets, 94 maoy moharong sa Davies Paints alang sa kampiyonato.
Miabante sa finals ang Davies Paints nga gipangulohan ni Celso Colegado human usab nila gilubong ang DBTHS '95 sa iskor nga 62-45.
Ang ilang tinaktakay nga title showdown gitakda karong Domingo didto gihapon sa DBTC gym.
Si Rammel Guimbarda mipabuhagay og 25 puntos alang sa Bullvets '94 nga milabaw 14 puntos sa halftime, 39-25. Ang walay puangod nga Bullvets '94 milusad og 23-11 run sa third period aron moposte og makabungog nga 26 puntos nga labaw, 62-36 paingon sa final period.
Si Ewen Lee Daclan mao lang ang bugtong player sa Greywolves nga miiskor og double figures pinaagi sa iyang 18 puntos. (BANAT PALARO)
- Latest
