CEBU, Philippines - Gipilde sa Blessel-Team Rama ni coach Charlie Reyes ang karibal nilang MacMae, 78-72 aron langkaton ang korona sa Pasil Sinulog Cup 2013 Open basketball tournament niadtong Biyernes didto sa Brgy. Pasil gym.
Sikit ang first quarter ug igo lang milabaw ang Blessel og dos puntos sa iskor nga 16-14, apan mitubo kini'g gamay sa halftime, 34-30.
Ang ex-pro nga si Danny Aying maoy miduslit sa mainitong rally sa first half sa abag nilang Jasper Diaz ug Resty Getubig nga maoy namuntos niadtong higayona.
Kalit lang nanginit ang Blessel sa third period aron mokulit sa ilang labing dakung labaw, 52-45.
Mihulga ang MacMae sa final quarter sa pagpangulo ni ex-PBA star Jimwell Torion, kinsa mitabla sa iskor, 69-all sa nahabiling 2:50 sa duwa.
Ang kanhi UV Lancer ug commercial veteran guard nga si Opie Abellana maoy misalbar sa Blessel pinaagi sa iyang mga krusyal nga assists ngadto nilang Michael Reyes ug Glad Ygay.
Si Aying miposa og 15 puntos aron pangulohan ang Blessel-Team Rama ni team owner Edgar Camota, samtang sila si Diaz ug Getubig nagkumboya og 23 puntos.
Ang MacMae gipangulohan ni Torion, kinsa miburak og 22 puntos, gisundan ni Michael Luga nga adunay 14 puntos. Ang taga- Pasil nga si Jerry Cavan miamot og 12 puntos alang sa MacMae.
PUNTOS MATAG USA
BLESSEL (78) - Aying 15, Diaz 12, Getubig 11, Ygay 9, Jueves 7, Abellana 7, Reyes 5, Daculan 5, Aniñon
4, Ponce 3
MACMAE (72) - Torion 22, Loga 14, Cavan 12, Codilla 10, Pepito 6, Gabas 4, Dimco 2, Bengito 2 (BANAT SPORTS)