CVIRAA, Batang Pinoy Games nabaraw ni 'Pablo'

CEBU, Philippines - Dumaguete City, Philippines -  Ang dili maayong kahimtang sa panahon dala sa bagyong "Pablo" nakabaraw sa tanang mga duwa nga gitakda karong adlawa sa 2012 Central Visayas Regional Athletic Association (CVIRAA)  Meet ug ingon man ang National Finals sa Philippines Sports Commission (PSC) Batang Pinoy Games didto sa Iloilo Sports Complex sa Iloilo City.

"As of 4 am today (yesterday) I together with the supervisors decided to officially cancel all the games in the CVIRAA because of typhoon "Pablo," matud pa ni Department of Education (DepEd)  Regional Office VII Director Carmelita Dulangon.

"We are doing this for the safety of the athletes, coaches and officials of the CVIRAA."

Ang Philippine Atmospheric, Geophysical and Astronomical Service Administration (PAGASA) mibutang sa Negros Oriental,  usa sa mga lugar nga gipaubos sa storm Signal No. 2.

Gumikan niini, gimandoan ni Dulangon ang tanang opisyales  sa pagpangandam alang sa evacuation. Ang mga delegado gikan sa dakbayan sa Bogo, Carcar ug Danao gipabakwit ngadto sa mas luwas nga dapit kay duol man sa sapa ang ilang billeting areas.

Mihangyo sab si Dulangon sa tanang 800 ka atleta ug 1,000 officials sa pag-secure sa ilang mga gamit ug puston ang ilang mga sinena og plastic bags aron dili kini mabasa.

"Gi-pull out namu ang mga bata nga naa duol sa rivers ang billeting area kay para dili pod mabalaka ang mga ginikanan sa atong mga bata. And I stopped the games because I don’t want nga masakripisyo ang mga bata and the tendency that they will panic. Maayo ra ang among pag-transfer and its orderly,"  sumala pa ni Dulangon.

Adunay kapin 6,000 ka mga atleta sa elementarya ug sekondarya ang misalmot sa lima ka adlaw nga regional sporting events nga gilangkuban sa mga atleta sa Cebu City, Cebu Province, Dumaguete City, Oriental Negros, Bohol, Siquijor, Tagbilaran, Bogo, Bayawan, Toledo, Tagbilaran, Talisay,  Naga,  Mandaue,  Lapu-Lapu, Guihulngan ug Danao.

Didto sa Iloilo City,  ang organizers mipakanaog og desisyon human sa kusog nga uwan nga miigo sa Western Visayas dala ni "Pablo" nga giisip nga labing kusog nga bagyo nga moigo sa Visayas ug Mindanao.

"Batang Pinoy was designed for the kids so in all the decisions that we make, we have to think of the safety and welfare of the kids," matud pa ni PSC commissioner Jolly Gomez, ang overall commissioner in charge sa kalihukan. (BANAT PALARO)