Tabal ug Languido midominar sa Milo

CEBU, Philippines - Ang Cebuana marathoner nga si Mary Joy Tabal ug taga-Bukidnon nga si Junel Languido maoy migawas nga mananaug sa Cebu leg sa 36th National Milo Marathon kagahapon didto sa Cebu City Sports Center.

Bisan pa og giluthan sa tiil, wala gihapon kapugngi si Tabal sa pagsakmit sa titulo sa 21k women’s class sa oras nga 1:26:58 nga mihatag usab kaniya og kahigayunan nga modagan sa National Milo Marathon finals sa Disyembre didto sa kaulohan.

Layu kaayo ang biya ni Tabal sa nagsunod kaniya nga si Joeyry Lee kinsa mitapos sa lumba sa oras nga 1:37:52 alang sa ikaduhang dapit, samtang si Madelyn Carter mipwesto sa ikatulong dapit sa oras nga 1:44:45.

Sa iyang bahin, si Languido nakapahimus usab sa bag-ong patakaran diin gidid-an ang mga langyaw nga mudaog. Si Languido maoy miangkon sa titulo sa men’s class sa oras nga 1:11:56.

Nag-una gyud og labang sa finish line ang Kenyan nga si Abraham Missos sa oras nga 1:11:50, apan wala siya gibayaw nga daog. Hinuon mi-qualify siya alang sa National finals diin tugtan na ang mga langyaw nga mudaog.

Gawas nila ni Languido ug Missos, laing mi-qualify sa nationals mao sila si Sherwin Managil sa oras nga 1:14:49 ug Bonifacio Monjas sa oras nga 1:14:51.

Sa 10k division, Ang German nga si Beate Krechlow ug Jordan Bacong maoy nag-una sa tagsa-tagsa nila ka dibisyon.

Si Krechlow mirehistro og oras nga 40:51, gisundan nila ni Aiza Suaybaguio sa 41:51 ug Mary Jane Beboso sa oras nga 44:57 alang sa ikaduha ug ikatulong dapit.

Si Bacong (34:16) giubanan nila ni Ronny Andrin (34:19) ug Adonis Singson (34:36) alang sa top three men’s finisher.

Mikampiyon sa 5k division mao sila si Lovely Fe Andrin (18:19) ug Jory Ycong (16:16), samtang nag-una sa 3k class mao sila si Cherry Andrin (11:51) ug Kent Lauron (12:03). (LPM)