Maayo nga gipaduwa'g balik sa Philippine Football Federation ang managsuong strikers nga sila si Phil ug James Younghusband alang sa ilang training sorties sa Middle East human sila wala paapila sa nakalabay’ng Peace Cup. Nahimo lang silang tig-abiba sa Phl Azkals nga mikampiyon sa maong torneyo.
Duna kini maayong resulta, una ang pagkadiskubre sa lain pang may mga potensyal nga Azkal team members nga makaiskor pud diay bisan wala ang mga Younghusbands ug ang ikaduha mao nga duna gyud siguro'y leksyon alang sa magsuon ang pagdaog sa ilang teammates bisan wala silang duha sa maong torneyo batok sa tulo ka mga nasud (Guam, Taiwan ug Macau).
Alang niadtong mga wala ganahi sa mga Younghusbands nga mabasa nato diha sa mga comments sa internet, sorry na lang mo kay mobalik ang duha human sa imbitasyon sa PFF. Hinuon mag-agad pa kini sa ilang mother teams, apan sa akong tan-aw buhian gyud sila nianang mga petsaha sa ME training camp.
Ang uwahing pagharos sa Azkals sa Peace Cup nga gikonsiderar nga Long Teng Cup maoy nagpasaka sa ranking sa mga Pinoy gikan sa 147 ngadto na sa 143 sa FIFA ranking nga maoy kinatas-ang nakab-ot sa Pilipinas sa ranking sa football.
* * *
Mihimo usab og pangalan ang ‘first choice’ goalkeeper sa Azkals nga si Neil Etheridge sa mihuwam kaniyang team didto sa Britanya nga mao ang Bristol Rovers FC. Si Etheridge usa sa mga goalkeepers sa iyang mother club nga Fulham FC.
Gani gibotaran ang Pinoy-Briton keeper nga Man of the Match sa duwa sa iyang bag-ong team batok sa Cheltenham bisan napilde sila niini sa iskor nga 1-0.
Si Etheridge, kinsa miisip sa iyang bag-ong team didto sa Britanya nga mga batan-on pa ug dili pa kaayo maayo ang teamwork.
Gipahibalo usab ni Etheridge sa report sa ABS-CBN Sports news online nga dili siya makaapil sa ME camp tungod sa iyang schedule. Ang Azkals makigsangka sa friendly matches batok sa Bahrain (Oct.12) ug Kuwait (Oct.16). Unta ma-live ni sa atong local channels.
* * *
PAGTULON-AN: "One man practicing sportsmanship is far better than a hundred teaching it." -- brainyquote.com