36th Milo Marathon Cebu leg mosikad ugma

CEBU, Philippines - Kapin sa 20,000 ka runners ang gilaumang mosalmot sa 36th Milo Marathon Cebu leg nga mosikad ugma nga manukad diha sa atubangan sa Cebu Normal University (CNU) ug matapos sa Cebu City Sports Center (CCSC).

Gipasiugdahan sa Nestle Philippines, ang lumba gibahin sa 21K, 10K, 5K ug 3K categories.

Ang lumba magsilbe nga qualifying race alang sa National Milo Marathon sa Disyembre 9 didto sa kaulohan.

Hinuon, dili sama sa miaging katuigan, giusab sa organizers ang patakaran sa pagpili sa mga modaog sa 21K race tungod kay bisan og moapil ang foreign elite runners, dili sila makadawat og premyo sa regional qualifiers.

Mahimong modagan ang mga langyaw aron lang mo-qualify sa national marathon, apan dili kini makadawat og ganti kun ugaling modaog. Ang mga ganti giandam lang alang sa top local runners.

"Gusto usab nato mo-develop atuang mga Filipino Olympians or champions so maong ato ning gibuhat," matud pa ni Nestle Philippines Sports Executive Andrew Neri.

"Mas nindot man gyud nga ang mo-present sa atong region, taga-ato gyud kay sa foreigner nga basta moadto lang sa Manila wala ra nila, para ra sa ilang kaugalingon," sumala pa ni Nestle Philippines consultant Pat Goc-Ong.

Gawas sa lumba, aduna say cheerdance competition sa elementary, secondary ug tertiary level atol sa awarding ceremony. Sa laing bahin, mga tinun-an gikan sa mga pampublikong eskwelahan dinhi sa Sugbu ang nakapahimulos sa "Help Give Shoes" advocacy program sa Milo.

Kini mao ang mga tinun-an gikan sa Camp Lapu-Lapu Elementary School, Lilo-an National High School, Cabancalan National High School, Mabolo Elementary School ug City Central School.  (BANAT SPORTS)