CEBU, Philippines - Nagtuo si Mexican boxing champion Juan Manuel Marquez nga anaa gihapon kaniya ang pabor sa ilang ikaupat nga sangka ni Manny Pacquiao tungod usab sa iyang taas nga kasinatian ug mas utokan nga istilo ibabaw sa ring.
Si Marquez padayun sa iyang way puas nga ensayo didto sa Romanza Gym sa Mexico diin iyang gitug-an nga hapit na niya makuha ang kondisyon alang sa ilang fourth fight ni Pacquiao sa Disyembre 8 didto sa MGM Arena sa Las Vegas.
“I’ll be coming with a lot of preparation and confidence. The goal is to try to win the fight by knockout,” matud pa ni Marquez. “Two factors accompany me: Intelligence and the experience.”
Bisan pa og walay timbang nga ilogan, giisip ni Marquez ang ikaupat nilang sangka ni Pacquiao nga usa ka bililhon nga away alang kaniya tungod kay may kahigayunan siyang ipakita nga siya gyud ang mas kusgan nga boksidor.
Si Marquez kinsa nailhan nga usa ka banggiitang counter-puncher adunay rekord nga 54-6-1, 39KOs, samtang ang Filipino boxing superstar nga si Pacquiao nagbitbit og rekord nga 54-4-2, 38KOs.
Sa iyang bahin, ang legendary Mexican trainer nga si Nacho Beristain niangkon nga nakita gihapon niya si Pacquiao nga usa ka delikadong kontra alang ni Marquez, apan salig siya sa abilidad sa iyang batos nga mohimo og impresibong kadaugan ning higayuna.