CEBU, Philippines - Giharos sa Sacred Heart School-Ateneo de Cebu (SHS-AdC) Magis Eagles ang tulo ka duwa aron sakmiton ang junior division title sa 12th Cebu Schools Athletic Foundation Inc. (CESAFI) basketball event kagabii didto sa Cebu Coliseum.
Ang Magis Eagles mipilde sa higpit nga karibal University of the Visayas (UV) Baby Lancers, 77-75 sa Game-3 sa ilang "best-of-five" championship showdown.
Nagkaguliyang ang mga tawo dihang ang blue ug white balloons nga maoy kolor sa SHS-AdC natagak sa ceiling sa gym dihang usa ka outsider ang mibira sa rope hinungdan nga nalahos kini'g nakatag sa sawog.
Nakapanemaho na og daog ang Magis Eagles dihang milabaw kini og tres puntos, 75-72 sa katapusang singko minutos sa duwa. Ang duha ka free throws ni Arc Gabrielle Araw-Araw maoy mikandado sa kadaugan sa Magis Eagles.
Mipakita na usab og talagsaong labok si Araw-Araw aron patilawon pag-usab ang Magis Eagles og labaw, 69-68 sa nahabiling 2:52 sa duwa ug sukad niadto naprotihian nila ang nipis kaayo nilang labaw. Katapusang nakasikit ang Baby Lancers sa iskor nga 70-71 sa free throws ni Ralph Jude Dinolan.
Nainat ang labaw sa Magis Eagles, 73-70 sa drive ni Giovanni Laguyo, nasundan kini sa perimeter jumpshot ni Araw-Araw aron inaton ang bentaha ngadto sa singko puntos sa katapusang 39 segundos sa duwa.
Si Araw-Araw mitusik og 18 puntos aron pangulohan ang Magis Eagles, gisundan ni Fletcher Galvez sa iyang 16 puntos.
Ang Baby Lancers gipangulohan ni Andres Paul Desiderio, kinsa mibugha og 19 puntos, samtang si Dinolan ug John Escalona miiskor og 14 ug 15 puntos matag usa.
PUNTOS MATAG USA
SHS-AdC (77) - Araw-Araw 18, Galvez 16, Ochea 9, Competente 8, Senining 8, Laguyo 8, Jaboneta 6, Padilla 2, Cercado 2
UV (72) - Desiderio 19, Dinolan 14, Escalona 13, Dela Cerna 8, Cabanilla 7, Limitares 5, Cañete 4, Santillan 2 (BANAT SPORTS)