Magis Eagles mohimo'g kasaysayan

 CEBU, Philippines - Paninguhaon sa Sacred Heart School-Ateneo de Cebu (SHS-AdC) Magis Eagles nga maharos  nila ang "best-of-five" title showdown batok sa defending champion University of the Visayas (UV) Baby Lancers sa ingon matambalan ang ilang kauhaw sa korona sa pagpadayon sa 12th Cebu  Schools Athletic Foundation Inc. (CESAFI) basketball event karong gabii.

Ang duwa mobalhin sa University of San Carlos (USC) sa Sanciangko st. sa alas-5:30 sa  hapon.

Nagtangag og 2-0 nga bentaha, ang Magis Eagles kinahanglan na lang og usa ka daog aron tak-opan ang ilang labing unang championship ning tinuig nga school-based basketball league.

Kun molampos na sab sila pagbuntog sa Baby Lancers, ang Magis Eagles maoy bugtong tunghaan nga milangkat og korona sa secondary division nga walay pilde.

Ang Magis Eagles midagit og 13 ka sunod-sunod nga daog sa pagka karon.

Karon adlawa, daw sa dili na kapugngan ang nagpanikad nga Magis Eagles pinangulohan sa  bag-ong  MVP   Henric Dawn Ochea ug ang iyang mga kaubanan.

Usa sa alas sa maong team mao ang Rookie of the Year awardee nga si Arc Gabrielle Araw-Araw,  kinsa nagpa-ila isip usa ka bag-ong sensation tungod sa iyang mga impresibong lihok ug hugot nga depensa, gawas pa  maayo sab mopasulod gikan sa 3-point area. 

Nakabentaha sab sa line-up ang Magis Eagles tungod kay ang ilang mga dagku nga mosuporta ni Ochea sa ilawom mas epektibo itandi nilang Prince Litton Cañete, John Philipp dela Cerna, Leonard Santillan ug Yusuf Samal sa Baby Lancers.  (BANAT SPORTS)