Tulo ka title fights

 CEBU, Philippines -  Human sa "Thrilla in Manila" niadtong tuig 1975, lain na sab kasaysayan sa boksing sa Pilipinas kay tulo  ka championship fights ang masaksihan sa "Pinoy Pride XVII: Philippines vs. The World" nga gitakda sa Oktubre 20 didto sa SM Mall of Asia Arena sa Pasay City.

Bidahan kini ni World Boxing Organization (WBO) No. 1 contender  AJ 'Bazooka' Banal (28-1, 20KOs) ug Thai Pungluang Sor Singyu (42-1, 27KOs) nga mag-ilog alang sa bakanteng bantamweight world.

"This event will dictate the future of Philippine boxing," matud  ni ALA Promotions President Michael P. Aldeguer atol sa press conference kagahapon didto sa Cebu Grand Hotel. "If AJ wins the title, this could be a start for something big not only for ALA Promotions but to the whole Philippine boxing."

Si Banal, kinsa napakyas sa una niyang pagsuway paglangkat sa world title human mapilde ngadto ni Panamian Rafael Concepcion diha sa Cebu  Coliseum upat na ka tuig ang nilabay, mitug-an nga nakuha na niya ang hustong kondisyon ug andam na siya sa labing dakung hagit sa iyang karera.

"Kondisyon nako, ready na gyud ko aning awaya," matud pa ni Banal, nga hapit na makaabot og 100 ka sparrings  batok sa iyang  stablemates sama nilang Michael Domingo, Mark Bernaldez, Joseph Von Miñoza ug Albert Pagara.

Sa supporting main event, si Rey 'Boom Boom' Bautista (33-2, 25KOs) makigbinukbukay batok ni Mexican Daniel Ruiz (27-5, 19KOs) alang sa bakanteng WBO International featherweight belt.

Kun modaog si Bautista, daku'g kahigayonan nga moaway kini alang sa world title ug posible batok ni WBO titlist Orlando Salido o di ba rematch nilang Daniel Ponce de Leon, kinsa mao karon ang naghupot sa WBC belt.

Sa laing regional title fight, si Jason 'El Niño' Pagara (29-2, 18KOs) makigharong ni Miguel Antoine (17-0, 9KOs) sa Barbados alang sa WBO International light welterweight crown.

Mokompleto sa undercard mao sila si Michael Domingo (44-16, 23KOs) batok Mudde Ntambe Rabison sa Uganda ug Marlon Tapales (20-1, 16KOs) batok Rasmudin sa Indonesia.  (BANAT SPORTS)