CEBU, Philippines - Mipauwan og mga bomba ang Talk N' Txt Tropang Texters sa himalatyong bahin sa duwa aron pagmasaker sa M. Lhuillier Kwarta Padala-Cebu Niños, 90-76 sa 2012 Mayor Mike Rama Cup PBA Pre-Season Games gabii didto sa Cebu Coliseum.
Sila si Kelly Williams ug Jayson Castro mibundak og 16 puntos matag usa alang sa Tropang Texters, kinsa wala kaayo maglisud sa pakigharong sa M. Lhuillier.
Puwerteng paninguha sa M. Lhuillier sa sayong bahin ug gani milabaw kini og kuwatro puntos, 51-47 sa nahabiling 4:45 sa third period, apan ang Tropang Texters mibawos pinaagi sa 11-2 run aron ilogon ang momentum, 58-53 paingon sa final period.
Sila si Stephen Padilla ug Jeric Cañada mitusak og sunod-sunod nga triple aron ilogan pagbalik sa M. Lhuillier ang bentaha, 60-58, apan mao ra kadto ang ilang kinutoban kay si Williams miiskor og sayes puntos aron hatagan ang Tropang Texters og 66-60 nga bentaha sa nahabiling 8:29 sa duwa.
Katapusang nakasikit ang M. Lhuillier sa iskor nga 73-78 dihang ang Talk N' Txt milusad og laing mainitong rally aron inaton ang labaw ngadto sa 14 puntos nga maoy labing daku nilang nahimo.
Sila Reyes ug Jayson Escueta misansan og 11 puntos matag usa alang sa Talk N' Txt, gisundan ni Rigo Gamalinda sa iyang 10 puntos.
Sila si Padilla, Eric Rodriguez ug Mark Magsumbol parehong mihipos og 14 puntos alang sa M. Lhuillier. (BANATNEWS)