CEBU, Philippines - Naghinam-hinam na ang Sugbuanong basketbolista Dondon Hontiveros nga mopakita sa iyang katakus uban sa bag-o niyang team Alaska Aces batok sa Talk N’ Text Tropang Texters sa opener sa 2012 Cebu City Mayor Mike Rama Cup PBA pre-season games karong Biyernes diha sa Cebu Coliseum.
Nasayran, si Hontiveros miduwa sud sa usa ka dekada sa San Miguel Beermen sa wala pa siya mabalhin ngadto sa Alaska ni team owner Fred Uytengsu pinaagi sa usa ka blockbuster trade.
Tungod niini, si Hontiveros makig-uban pagbalik ni Alaska coach Luigi Trillo, kanhi assistant coach sa Cebu Gems sa nabungkag nga Metropolitan Basketball Association (MBA) diin siya misikat.
Ang Alaska-Talk N' Text match sugdan sa alas-7 sa gabii, human sa duwa tali San Mig Coffee Mixers nga pangulohan ni James Yap ug sa host team M. Lhuillier Kwarta Padala nga gikatakda sa alas-5 sa hapon.
Ang pag-apil sa tulo ka teams sa maong torneyo kabahin sa ilang pagpangandam alang sa 38th season sa PBA nga sugdan sa Septiyembre 30 didto sa Smart Araneta Coliseum.
Ang mga tiket nagkantidad og P30 sa general admission, P100 sa upper box, P200 sa lower box, P250 sa reserve seats ug P300 sa ringside.
Alang sa dugang mga pangutana, mahimong motawag sa numero 0927-3028181 o 0932-6071590. (BANAT NEWS)