CEBU, Philippines - Gipangulohan sa maabtik nga guard nga si Dondon Cadungog kinsa mibahug og 12 puntos samtang parehong mitunol og 10 puntos matag usa silang Michael Garcia ug Ranel Patalita alang sa Dark Team kinsa mipukan sa Light team sa iskor, 81-76 kaniadtong Biyernes sa gabii atol sa gipahigayong tinuig nga F. Llamas Youth Association (FYA) All-Star Game didto sa barangay Tisa gym.
Si Patalita maoy mihatag sa Dark sa ilang labing dakung labaw nga 12 puntos, 74-62 apan ang back-to-back baskets ni Archie Rupal sa uwahing bahin sa fourth period nga naghatag og 81-70 nga abante, maoy nagselyado sa duwa sa nahibiling uno minuto.
Gawas sa pagpanulo sa opensa, nagpunay sab og himo'g assists ngadto sa iyang mga kauban si Cadungog.
Napilde man tuod ang Light Team apan usa kadto ka record-breaking performance ni Noel Medalle kinsa mihimo'g 5 of 5 sa iyang three-point attempts sulod lang sa first half. Gihimong firing range ni Medale ang gamitoy nga ring sa Tisa gym diin wala siya mohimo'g tirada nga two-pointer apan pulos gyud triples.
Bisag wala motiwas si Medalle sa duwa, nakahimo gihapon siya'g 15 puntos apan si Ryan Villaver maoy nangu sa Light sa iyang 18 puntos.
Miunag uli si Medalle tungod kay aduna siya'y laing kalihokan uban sa iyang higala nga si Rady Abarintos, ang hepe sa Cash Division sa lokal nga Bureau of Customs.Siya sab ang playing coach sa Simple Likes Barbecue Haus kinsa natagak na sa ilang kasamtangan nga torneyo.
Sa wala pa mobiya sa korte sia Medalle, ang Light Team maoy naglabaw, 41-38 apan nausab ang dagan sa duwa dihang wala na si Medalle.
Silang Villaver ug Medalle giabagan sab ni Lito Mirasol kinsa midugang og 12 puntos.
Si Daniel Enriquez kinsa maoy champion sa slam dunk contest, miskor og otso puntos uban kang Tata Laborte. Aron maanindot tan-awon ang slam dunk, migamit ang mga organizers og junior size nga ring. Nalupig ni Enriquez si EJohn Fernandez, 24-15 sa finals.
Ang comebacking ug kanhi 3-point king nga si Burnong Endrina maoy kampiyon sa three-point shootout sa iyang nuybe puntos samtang si Wesley Carzano sa Evoo Resto Bar maoy hari sa skills champion.
Ang tandem nilang Medalle ug Onyot Masongsong maoy kampiyon sa two-ball competition sa ilang 23 puntos, mas gamay kung itandi sa ilang 32 puntos sa elimination.
Puntos matag usa:
Dark (81)—Cadungog 12, Garcia 10, Patalita 10, Rupal 10, Caballes 9, Dacayana 8, Mayol 7, Caballero 6, Limbaga 6, Alkuino 3
Light (76)— Villaver 18, Medalle 15, Mirasol 12, Enriquez 8, Laborte 8, Codilla 6, Fernandez 4, Teves 2.