Bradley gitubag ni Pacman

Human siya tawga og talawan ni Tim Bradley, si Filipino boxing icon Manny Pacquiao nagtuo nga wala na gyud siyay rasun nga sangkaon ang undefeated American boxer tungod kay dili na interesado ang mga fans.

Si Pacquiao nagkanayon nga wala na siyay lain pamatud-an batok ani Bradley tungod kay nagtuo siya nga siya ang midaog sa una nilang sangka niadtong Hunyo didto sa Las Vegas. (LPM)

Kalima gyud natumba

Milampos si Mexican boxing champion Saul ‘Canelo’ Alvarez sa pagdepensa sa iyang WBC light middleweight title human niya gipaundang sa fifth round ang challenger nga si Josesito Lopez.

Si Alvarez mipahayang ni Lopez sa ikalimang higayun sud sa lima ka rounds sa wala pa undanga sa referee ang away sa fifth round. (LPM)

Hatton, amahan gasumbagay

Gidakop sa mga tinugyanan sa balaod si Ray Hatton human kini gireklamo og pagpanapat sa iyang anak nga si kanhi British boxing champion Ricky Hatton.

Ang mag-amahang Hatton gikatahong nagkagubot, diin gitudlo nga nagpasiugda mao si Ray kinsa nanapat og una ni Ricky human sa grabeng panaglalis. (LPM)

Minilyon na usab madawat ni Pacquiao

Gibana-banang kapin sa $25 million ang madawat ni Filipino boxing superstar Manny Pacquiao alang sa nagsingabot niyang sangka batok ni Mexican Juan Manuel Marquez sa Disyembre 8 didto sa MGM Arena sa Las Vegas.

Mismo ang abogado ni Pacquiao nga si Franklin Gacal ang mitug-an nga usa sa dakung rasun sa pagpili ni Pacquiao nga sangkaon si Marquez mao ang dakung kitaon niini lakip na ang dakung bahin sa pay-per-view.

Sa katapusan nilang sangka niadtong miaging tuig, si Pacquiao ug Marquez mirehistro og 1.4 million pay-per-view, layo ra sa 900,000 nga kinitaan sa Pacquiao-Bradley fight niadtong Hunyo.

Hinuon si Gacal nagkanayon nga bisan pa sa dakung kuwarta, maisip nga usa ka sugal ang buhaton ni Pacquiao sa pakigsangka ni Marquez kinsa ilang giisip nga usa ka delikadong kontra alang sa Pinoy boxing superstar.

Si Marquez nakadawat og $5 million nga guaranteed prize sa third fight nila ni Pacquiao, apan ning higayuna, gipaabot nga doble pa ang madawat sa Mexican boxing champion.