CEBU, Philippines - Nagmangtas ang idlas nga pointguard nga si Arc Gabriel Araw-araw aron giyahan ang topseed Sacred Heart School-Ateneo de Cebu (SHS-AdC) pagkutlo og 77-60 nga kadaugan batok sa fifth-ranked Cebu Eastern College (CEC) Dragons pagsugod sa semifinal round sa 12th Cebu Schools Athletic Foundation Inc. (CESAFI) basketball event kagabii didto sa Cebu Coliseum.
Wala makapuntos si Araw-araw sa third period dihang gihigpitan siya'g bantay sa mga guwardiya hinungdan nga nakaapas sa makadiyot ang Dragons, kinsa gilubong og labing menos 26 puntos sa second period, 30-4.
Mihimo sab og rekord ang Magis Eagles pinaagi sa pagpugong sa Dragons ngadto lang sa dos puntos human sa first period, 26-2.
Migukod ang Dragons ngadto na lang sa 10 puntos nga maoy labing sikit nila sa duwa, 45-55 sa sayong bahin sa fourth quarter, apan gilubong sila’g balik dihang namuntos pag-ayo si Araw-araw, kinsa miiskor og 13 puntos sa fourth period.
Si Araw-araw maoy nangu sa Magis Eagles sa iyang 18 puntos, samtang sila si Henric Dawn Ochea ug Jair Igna miburak og 13 puntos matag usa. Pareho sab nga mikadlit og nuybe puntos silang Rendell Thomas Senining ug Arnie Padilla sa maong kadaugan.
Ang Dragons gipangulohan ni Alfons Alvizo nga mibugwak og 14 puntos, gisundan ni Neil Christohper Bracero nga adunay 12 puntos.
Puntos Matag Usa
SHS-AdC (77) - Araw-araw 18, Ochea 13, Igna 13, Senining 9, Padilla 9, Competente 7, Ecarma 6, Jaboneta 5, Catan 2
CEC (60) - Alvizo 14, Barcero 12, Bayhonan 10, Berdera 9, Zosa 9, Bacho 3, Mangyao 2, Grijaldo 1 (BANAT NEWS)