Teletech miabante sa conference finals

CEBU, Philippines – Gitiwasan sa Teletech Titans ang Lexmark Stallions uban ang 79-68 nga kadaugan aron moabante   sa   conference   finals sa Sun Cellular-presented 8th CSCC E-League basketball tournament   niadtong Domingo didto   sa   City Sports Club-Cebu gym sa Cebu Business Park.

Sa lain pang mga aksiyon, ang Convergys Wolves nakaginhawa pa human gipilde ang defending champion Stream Ingenyouity, 57-44, samtang ang Sykes Pioneers mibuntog sa Odusee Rooz 68-56 sa ilang kaugalingong "best-of-three" series.

Lahi sa miagi nilang engkuwentro, ang Titans nagsalig sa ilang mainitong rally sa katapusang duha ka kuwarter aron taktakon ang Stallions.

Ang tirador nga si Sherwin Emanuelle Resilla mao na sab ang nangulo sa Teletech pinaagi sa iyang 19 puntos, uban ang walo ka rebounds, gisundan ni Lourenz Limpangog nga mitimbre og 18 puntos.

Sa laing bahin, si Ellison Rivera mihaling og 20 puntos aron pangulohan ang kainit sa Convergys, kinsa nagmalampuson human nila napugngan ang alas sa Stream ug reigning MVP nga si Sylvester Millevo ngadto lang sa dos puntos nga maoy pinaka-ubos niini nga iskor karon nga season. Si Benjie Mancao mao lang ang bugtong mikulit og doubles figures alang sa Stream pinaagi sa iyang 13 puntos.

Sa laing duwa, si Reggy Sultan mitikdol og 12 puntos ug milangkat og unom ka rebounds alang sa Sykes nga wala na milingi pa human miposte og 21-11 sa bentaha sa unang kuwarter.

PUNTOS MATAG USA

Unang duwa:

Sykes (68) - Sultan 12, Sahilan 10, Castañares 8, Diputado 8, Montelibano 7, Suarez 7, Lepardo 6, Diotay 5, Umabong 3, Te 2

Odusee (56) - Cabilino 16, Abrantes 15, Abellanosa 7, Downey 6, Cadiz 5, Degoro 3, Igot 2, Macaraya 2

Ikaduhang duwa:

Convergys (57) - Rivera 20, Tapic 8, Auman 8, Loyola 4, Cleopas 4, Yam 3, Cipres 3, Mabanto 2, Mora 2, Rebalde 2, Villarin 1

Stream (44) - Mancao 13, Bibera 8, Alquilos 6, Arroyo 5, Quintana 5, Arroyo 5, Recla 3, Millevo 2

Ikatulong duwa:

Teletech (79) - Resilla 19, Limpangog 18, Yulo 9, Anghay 7, Romulo 7, Quianzon 5, Escuarfdo 4, Pardillo 3, Capillanes 3, Banua 2 Mata 2

Lexmark (68) - Balansag 23, Cipriano 18, Talan 8, Pia 6, Ofonda 4, Divinagracia 4, Lanzaderas 3, Torrepalma 2 BANAT SPORTS