Magis Eagles miharos sa elimination

CEBU, Philippines - Giharos sa Sacred Heart School Ateneo de Cebu (SHS-AdC) Magis Eagles ang ilang walo ka duwa sa elimination round human nila hungiti ang defending champion University of the Visayas (UV) Baby Lancers sa labing unang pilde, 97-82 kagahapon sa 12th   Cebu Schools Athletic Athletic Foundation Inc. (CESAFI) didto sa USC-Main gym.

Mi-rally unta ang Baby Lancers gikan sa ilang 53-71 nga biya ngadto na lang sa 63-75 paghuman sa third period. Apan miburot og balik ang labaw sa Magis Eagles dihang mitusak og duha ka sagunson nga three-pointers si Arc Gabriel Araw-araw uban sa tabang ni Henric Dawn Ochea aron tumbahon ang Baby Lancers nga nagbitbit og 7-1 nga baraha.

Si Araw-araw maoy nangu sa Magis Eagles sa iyang 17 puntos, samtang si Ochea midugang og 16 puntos.Silang Giovanni Laguyo, Arnie Padilla ug Thomas Rendell Senining pulos sab miiskor og double figures.

Ang Baby Lancers gipangulohan ni reigning MVP Paul Andres Desiderio, kinsa mikadlit og 41 puntos, apan nakawang lang ang iyang mga paningkamot kay kulang siya og suporta gikan sa iyang kaubanan. ss

PUNTOS MATAG USA

SHS-AdC (97) - Araw-araw 17, Ochea 16, Laguyo 15, Padilla 14, Senining 12, Jaboneta 7, Igna 7, Cerdado 7, Catan 4

UV (82) - Desiderio 41, Dela Cerna 8, Santillan 7, Samal 7, Cañete 5, Limitares 4, Escalona 4, Manzo 3, Dinolan 2, Fernandez 1   - BANAT NEWS