CEBU, Philippines - Masukod ang katakus sa University of the Visayas (UV) Green Lancers dihang moduwa kini batok sa mga dekalibreng magduduwa gikan sa PBA ug sa Asian Basketball League (ABL) sa usa ka "exhibition game" karong Sabado diha sa UV-main gym.
Ang duwa sugdan sa alas-4 sa hapon human sa preliminary match tali sa UV Baby Lancers ug UV developmental team nga gikatakda sa alas-2:30 sa hapon.
Gipangulohan ni 6-foot-7 Nigerian Cedrick Akomo ug center Hernal 'Wowie' Escocio, ang Green Lancers ni coach Felix 'Donbel' Belano Jr. moduwa batok sa nagkahiusang puwersa sa PBA ug ABL nga naglakip nilang Rob Wainwright, Mark Andaya, Al Vergara, Jam Alfad, Ramsey Williams, Ken Bono, JR Gerilla, Jason Wade.
Moduwa sab uban sa PBA-ABL selection mao ang 6-foot-9 import nga si James Garnette gikan sa France ug commercial standouts Stephen Padilla ug Jayford Rodriguez, kinsa pulos mga sakop sa UV champion team atol sa ilang collegiate days.
Ang UV Lancers, kinsa maghangad usab nilang Eman Calo, John Abad, Jerome Silva ug Raffy Oktubre, bag-o lang miharos sa unom nila ka duwa sa elimination round nga naghatag kanila og automatic semifinals berth sa 12th Cebu Schools Athletic Foundation Inc. (CESAFI) basketball tournament.
Human sa ilang duwa batok sa PBA-ABL selection, sila si Akomo ug Escocio moduwa na usab uban sa CESAFI selection nga makigharong sa Petron Blaze Boosters karong Domingo sa Cebu Coliseum.
Ang Petron langkuban sa duha ka Sugbuanong PBA players nga sila si Dondon Hontiveros ug 2012 No.1 draft pick Junemar Fajardo. - BANAT NEWS