6-0 sweep sa Lancers

CEBU, Philippines - Giharus gyud sa University of the Visayas (UV) Green Lancers ang elimination round sa ilang 6-0 nga baraha ug makapahuway na sila'g taas nga panahon tungod kay mo-bye man sila sa quarterfinals ug magpaabot na lang sa ilang sunod sangka sa semifinals unya sa Septiyembre 11 sa nagpadayong 12th season sa Cebu Schools Athletic Foundation, Inc. (CESAFI) diha sa Cebu Coliseum.

Samtang hingpit nang gihuptan sa Lancers ang unang pwesto, magkumbate pa ang laing unom ka teams kung kinsa kanila maoy mo-abante sa top 4.

Ang no. 2, 3 ug 4 human sa elimination karong Septiyembre 1 adunay twice-to-beat advantage batok sa no. 5, 6 ug 7 qualifiers aron pagsuta kung kinsay mo-abante ug kinsa ang matagak.

Niadtong Hulyo 30 dihang nagpatawag og meeting sa mga sakop sa Editorial staff si Sir Dodong Gullas, ang chairman sa The Freeman Daily ug Banat News publications didto sa mabugnaw kaayong HRM room sa UV, gipangutana ako ni Sir Johnvic nga kumusta ang UV Lancers?

Bisan og wala pa ako makakita unsay labok sa UV niadtong tungora kay wala pa man sila makaduwa, ako dayong gitubag si Sir Johnvic nga okay kaayo Boss kay nakabentaha sa gitas-on.

Unang daog sa Lancers niadtong Agosto 2 batok sa University of Southern Philippines Foundation (USPF) Panthers sa iskor, 86-63. Sa ubang teams nga ilang gipilde lakip ang top 4 teams--USJR (89-76), UC (86-80) ug ang labing bag-ong biktima ang Southwestern University (SWU) Cobras, (95-86) dili lunlon gitas-on ang ilang gisaligan apan ang individual talent sa matag player ilabi na kanilang Jerome Silva, Phil Mercader ug Eman Calo.

Midaug sab sila batok sa USC, 98-76 ug batok sa CIT-U, 72-51 nga maoy labing dako nilang winning margin.

Dili ikalimod nga gitas-on sab ang hinungdan nganong naka back-to-back champions ang UC Webmasters tungod kay sa maong duha nila ka korona, nagduwa pa ang 6'9 nga sentrong si June Mar Fajardo nga bag-o lang napili nga no. 1 draft sa PBA ug moduwa alang sa Petron Blaze.

Karon pa lang gani kasayo, dili ako mahibulong kung mahimong kampiyon ang Lancers nga dili gyud makasugat og pilde. Dili mabangbang ang ilang rotation sa big men tungod kay magkadungan og sulod silang Steve Cedrick Akomo ug Wowie Escocio dayon mahimong magkadungan silang Rene Jun Saycon ug Andrew Avillanoza ug tiwasan pa gyud kini nilang Chris Perolino ug Rhaffy Octobre.

Tinuod mga tag-as ug mga dagkung lawas silang Justine Aboude ug Benoit Mbala nga adunay gitas-on nga 6'6 apan tungod sa rule o balaud sa import, dili sila mahimong magdungan og sulod sa korte. Busa usa lang kanilang Aboude ug Mbala maoy bantayanan sa ilawom ug kung bisan asa kanila ang dili maayo og duwa, dili maayo ang resulta sa Cobras.

Gawas pa niana, dili kaayo maayo'g pulso sa free throws ang duha ka Cameeronian imports busa kung magligas-ligas lang ang duwa, dili kaayo sila dakung hulga sa free throw ug mas maayo gani og sila maoy hatagan og foul kung itandi kanilang Monbert Arong, Bernie Bregondo ug Joseph Nalos kay lahi ang dagan sa duwa.

Sa makadaghang higayon, among mahisgotan sa press table nga daw mas lig-on gani ang Cobras sa miaging tuig samtang diha pa silang Eleazar Armecin ug Rene Pacquiao kay mga hinog na silang daan sa ilang kataposang tuig sa CESAFI ug kana silang Merbien Dedace, Daryl Goloran ug Bernie Bregondo mga second stringers lang sa miaging tuig ug wala pa sila si Christopher Lopez ug Jestoni Casquejo.  

Good luck ninyong tanan. See you in CESAFI. 

MISCELLANEOUS. Welcome back to Cebu my friend Drazen "Taten" Ceniza. Thanks for the KD35 Thunder t-shirt and LINSANITY cap (17NYK). Taten is a Physical Therapist now working in a New York City hospital and will be here for a six-week vacation. He is also having a reunion with the Ceniza clan of Cabancalan, Mandaue City that included the Eskina Pilit Boys led by Cabancalan barangay councilor Jun Saberon whose wife Cecilia, is a member of the Ceniza clan.