Smart Gilas kampyon

CEBU, Philippines - Gipakita sa Smart Gilas Team Pilipinas nga dili imposible ang damgo sa Pilipinas nga mabalik isip basketball power-house sa Asya dihang milampos sila pagsakmit sa titulo sa 34th William Jones Cup batok sa USA selection sa usa ka kulbahinam nga, 76-75 nga kadaugan kagahapon didto sa TPEC Gym sa Taiwan.

Ang Pilipinas mitapos sa torneyo sa record nga 7-1 diin bugtong pilde nila nagagikan sa kamot sa Lebanon.

Usa kini ka dakung kalampusan sa bag-o lang naporma nga National team ubos sa giya ni coach Chot Reyes tungod kay kini lang ang ikaupat nga higayun nga nasakmit sa Pilipinas ang kampyonato sa maong torneyo. Ang Pilipinas katapusang mikampyon sa Jones Cup niadtong tuig 1998.

Gipamatud-an ni Alaska Ace point-guard LA Tenorio nga way daku nga makapuling, dihang siya maoy mipatay sa depensa sa mga Amerikano. Si Tenorio maoy nangulo sa Pilipinas sa iyang 20 puntos lakip na ang mga krusyal nga puntos sa final period.

Gibiyaan pa sa first half ang Gilas sa mas tag-as nga USA, 23-34, apan hinay-hinay nga mibalik ang mga Pinoy aron mohimo og dakung upset.

Ang naturalized center nga si Marcus Douthit miposte usab og double-double 17 puntos ug 13 ka rebounds, samtang ang guwardiya sa USA nga si James Justice miiskor og 18 puntos.