PBA giant

May bagong aabangan ang mga PBA fans--ang higanteng si June Mar Fajardo.

Si Fajardo ang naging top pick sa rookie draft nung Linggo at agad-agad ay marami ang umasa na magi­ging malaki at malakas ang kanyang impact sa PBA.

May taas na 6’10 si Fajardo sa murang edad na 22. Kung titingnan mo ang kamay niya ay halos kasing-laki ng baseball gloves. Size 17 ang mga sapatos niya.

Hindi ko pa masyado nakilatis ang laro ni Fajardo pero sa aking alam ay ibang klaseng 6’10 ito. Mas ma­­galing sa ibang big men sa PBA.

Kaya naman marami ang mag-aabang sa kanyang unang laro para sa Petron.

Maraming pahihirapan si Fajardo sa PBA dahil nga sa laki niya ay nakakakilos siya ng mahusay. In short, hindi siya lalampa-lampa.

Nakausap natin si Fajardo matapos siyang ma-draft, at masaya ang kanyang tinig. Excited din siya.

Nagpasalamat siya sa mga tumulong sa kanya ha­bang naglalaro siya sa University of Cebu, lalu na ang kanyang coach na si Roel Gomez, ang dating player ng Alaska.

Binigyan din daw siya ng mahahalagang tips ni Ra­­mon Fernandez, ang four-time MVP sa PBA, na naka-base din sa Cebu. Salamat din daw.

Mababa ang boses ni Fajardo. Parang nanggaga­ling sa balon. Ganun din naman yata ang ugali niya. Muk­hang hindi mayabang. Mapag-kumbaba.

Kahit si B-Meg (San Mig Coffee Mixers na ngayon) coach Tim Cone ay panay ang puri sa kanya.

Kinumpara nga ni Cone si Fajardo kay Kareem Ab­dul Jabar, maliban lang siguro sa pinasikat na hook shot ng Amerikanong seven-footer.

Siniguro na ni Cone na magiging dominanteng pla­yer si Fajardo sa PBA. Pang MVP pa nga daw. Para nga daw itong 6’10 na Danny Ildefonso.

Tiyak maraming susupalpalin.

Mahirap tumutol o kumontra sa sinabi ni Tim Cone. Hindi naman niya itataya ang kanyang salita kung hindi siya sigurado sa mga nakita niya kay Fajardo.

Sige nga June Mar, pasiklaban mo kami.