Warriors miihaw sa Panthers alang sa ikaduhang daog

CEBU, Philippines - Ang guwardiya nga si June Michael Cantonao miposa og duha ka sunod-sunod nga triples sa nanghinapos nga bahin sa final period aron hatagan ang University of San Carlos (USC) Warriors sa ikaduha nilang daog pinaagi sa pagpilde sa University of Southern Philippines Foundation (USPF) Panthers, 83-73 sa 12th Cebu Schools Athletic Foundation Inc. (CESAFI) basketball event niadtong Domingo sa gabii didto sa Cebu Coliseum.

Ang unang triple ni Cantonao maoy nakapahayag sa ilang kadaugan dihang ang Warriors miposte og 78-73 nga labaw sa nahabiling 1:33 sa duwa.

Human makahimo og turnover sa Panthers, si Cantonao mitusak og laing triple aron inaton ang labaw ngadto na sa 81-73.

Ang duha ka free throws ni Nilton John Otida sa katapusang 30.2 segundos maoy naghatag sa Warriors og 10 puntos nga kadaugan

Si Cantonao mihipos og 16 puntos, apan ang American-Taiwanese nga si Stephen Que maoy topscorer sa USC sa iyang 19 puntos. Si Nico Magat midugang og 14 puntos alang sa Warriors nga nagbitbit og 2-2 nga baraha ubos sa pagtimon ni Cebuano basketball legend Julian Macoy.

Si Sedurifa maoy nangulo sa Panthers pinaagi sa iyang 25 puntos, samtang sila si Fritz Dajalos ug Joshua Corcilles nagkumboya og 23 puntos.

Sa junior division, ang defending champion University of the Visayas (UV) Baby Lancers milubong sa University of Cebu (UC) Junior Webmasters sa iskor nga 101-86.

Ang reigning MVP nga si Andres Paul Desiderio mihakot og 26 puntos ug si Gerald Fernandez mihipos og 20 puntos alang sa Baby Lancers nga nagsolo sa liderato bitbit ang 6-0 nga baraha.

Silang Andrey Armenion ug Justine Dacalos parehong mibahog og 16 puntos aron pangulohan ang 3-3 nga Junior Webmasters.

PUNTOS MATAG USA

(Secondary)

UV (101) - Desiderio 26, Fernandez 20, Manzo 11, Limitares 10, Santillan 9, Dinolan 8, Mepaña 7, Bercero 4, Suan 2, Canete 2, Cabanilla 2

UC (86) - Armenion 16, Dacalos 16, Orquez 14, Ramos 9, Alocillo 9, Gastador 8, Dela Fuente 6, Igloria 4, Paon 3, Montilla 1

(Collegiate)

USC (83) - Que 19, Cantonao 16, Magat 14, Otida 12, Pepito 9, Valencia 5, Bautista 2, Adlawan 2, Seno 2, De Jesus 2

USPF (73) - Sedurifa 25, Dajalos 12, Corcilles 11, J. Ferraren 9, E. Ferraren 5, Camello 4, Misa 4, Sollano 3  (BANAT SPORTS)