Nangabot na

CEBU, Philippines - Duha ka Mehikanong boksidor sa "Pinoy Pride XV" ang miabot na dinhi sa Sugbu.

Misaad ang duha nga ilang tilukon ang tanan nilang kusog aron mohimo og impresibong kadaugan batok sa duha ka ALA boxers sa "Pinoy Pride XV: Philippines vs. Mexico-The Rematch" nga bidahan nilang Jason Pagara ug Rosbel Montoya nga magsangka alang sa WBO International jr. welterweight title karong Sabado diha sa Waterfront Hotel and Casino.

Sila si Michael 'Arcanghel' Martinez ug Jorge 'El Feroz' Pazos nga miabot dinhi sa Sugbu niadtong Lunes pulos mipadayag sa ilang tinguha pagpilde sa beteranong Jimrex Jaca ug Genesis Servania atubangan sa mga Cebuano fans.

"We promised a spectacular fight, we prepared hard for this fight and we are ready against them (ALA boxers)," matud pa ni Martinez atol sa press conference kagahapon didto sa Patio Isabel sa Brgy. Banilad, ning siyudad.

Gawas sa "rematch"   tali nilang Pagara (28-2, 17KOs) ug Montoya (36-4-1, 30KOs)    gilauman usab karon ang kulbahinam nga sangka nilang Martinez ug Jaca.

Gitataw sa kampo ni Martinez ang tinuoray nga rekord sa Mehikano nga adunay 18-2, 13KOs sukwahi sa unang gipagawas nga 13-2, 9KOs.

Tungod niini, maisip karon nga usa ka delikadong kontra si Martinez alang ni Jaca, kinsa moaway pagbalik human sa dul-an usa ka tuig niya nga pagpahuway sa boksing.

 Sa iyang bahin, si Pazos   miangkon nga usa ka ngilngig nga kontra si Servania, apan dili kini niya atrasan atol sa ilang sangka. 

Sila si Pazos (20-3, 13KOs) ug Servania (18-0, 7KOs) magsangka alang sa bakanteng WBO Asia Pacific super bantamweight title. (BANAT NEWS)