Magis Eagles nagsolo sa liderato

CEBU, Philippines - Temporaryo karong nagsolo sa liderato ang Sacred Heart School-Ateneo de Cebu (SHS-AdC) Magis Eagles human gibihag ang Don Bosco Technology Center (DBTC) Junior Greywolves, 67-49 sa 12th Cebu Schools Athletic Foundation Inc. (CESAFI) basketball event kagahapon didto sa Cebu Coliseum.

 Karong adlawa, tinguha sab sa defending champion University of the Visayas (UV) Baby Lancers nga makig-uban sa liderato diin ilang suwayan pagpukan ang Cebu Eastern College (CEC) Dragons. 

Sa kasamtangan, ang Baby Lancers nagbitbit og 2-0 nga baraha, sunod sa Magis Eagles nga nagtangag og 3-0 win-loss record.

Maayong pagkabahin ang iskor sa Magis Eagles nga gipangulohan ni Dawn Henric Ochea pinaagi sa iyang 14 puntos.

Si Nini Roel Geralidizo maoy nangu sa Junior Greywolves nga midaro og nuybe puntos.

Sa laing duwa, ang CEC Dragons nakarekober gikan sa ilang 61-71 nga kapildihan sa Magis Eagles ug maoy ilang gipahimungtan ang University of San Jose-Recoletos (USJR) Baby Jaguars, 89-33.

Ang Dragons gipangulohan ni Maric Joel Bacho, kinsa mibugwak og 16 puntos, samtang ang Baby Jaguars gipangulohan ni Sean Anthony Espiritu sa iyang 12 puntos.

Midaog sab ang Cebu Institute of Technology-University (CIT-U) Wildkittens batok sa University of Cebu (UC) Junior Webmasters sa iskor nga 82-78.

Si Mark Kong mihakot og 25 puntos alang sa CIT-U, samtang sila si Charles Singson ug Kresne Kyle Jabines midugang og 15 puntos matag usa.

Ang Junior Webmasters gipangulohan sab ni Andrey Armenion sa iyang 21 puntos, gisundan ni Juan Miguel Gastador nga adunay 15 puntos. - BANAT NEWS