Tapic midominar sa Stage 2

CEBU, Philippines - Laing garbo sa Sugbu nga si Marvin Tapic sa team Cebu Province ang midominar sa Stage 2 sa Cebu Challenge Cycling Classic: Tour of Cebu kagahapon.

Ang lumba nanukad sa Bogo City paingon ngadto sa Barba Sports Complex sa Toledo City.

Si John Renee Mier sa Team LBC nga maoy nag-una sa prologue stage ug stage 1, mao gihapon ang nagkupot sa "yellow jersey" human siya mitapos sa ikaduhang dapit sunod ni Tapic.

Sa overall individual ranking, sila si Mier ug Tapic nagtabla sa oras nga 4:36.46.18. Mipuwesto sa partial fifth placer mao sila si Rustom Lim (4:37.04.52), Irish Valenzuela (4:37.22.83) ug Cris Joven (4:37.24.64).

Si Mier nag-una sud sa ika-86 kilometro sa lumba, apan kalit lang miarangkada si Tapic sa katapusang tres kilometros sa maong stage aron makuha ang liderato gikan ni Mier.

Atngan karon ang higpit nga kompetisyon sa duha ka rider sa penultimate round nga adunay gilay-on nga 186.7 kilometros. Manukad kini sa Bogo City paingon ngadto sa Argao. Ang lima ka adlaw nga lumba tapuson pinaagi sa criterium stage ugmang adlawa diha sa Cebu International Convention Center. - BANAT NEWS