01K Drivers miarangkada sa Mandaue caging
CEBU, Philippines - Milabyog na usab og daog ang 01K Drivers and Operators MPC human sa ilang pagpilde sa ECSEMCO-Eversley, 72-60 sa nagpadayong aksiyon sa 3rd Mandaue City Cooperative Sportsfest niadtong Lunes sa gabii didto sa Mandaue Plaza basketball court.
Sila lang si Paz ug Libanan ang mikabya og double figures, apan igo na kaayo kini aron ilang mapadaog ang 01K team nga gilangkuban sa mga drayber sa OIK passenger jeepneys nga diha nanimuyo sa dakbayan sa Mandaue.
Si Paz miarangkada og 31 puntos, samtang si Libanan miariya og 16 puntos alang sa 01K Drivers nga mikulit sa ilang ikatulong daog sud sa upat ka duwa.
Ang 2-2 nga ECSEMCO-Eversley gipangulohan ni Mondoñdo, kinsa mitusak og 17 puntos, gisundan ni Kanleon nga adunay 11 puntos.
Gawas sa 01K Drivers ug ECSEMCO-Eversley, lain pang 10 ka teams nga nisalmot sa kompetisyon naglakip sa Tabok Allied Workers MPC, Pacific Traders MPC, SMC-Mandaue Credit Employees (San Miguel), Cebu People's Coop, MCPO (Mandaue Police Office), Dedon (DEMCO), Fast Mover (Magnolia), All Fresh Food (Goldilocks) ug ang CENVIPNUMCO.
Ang torneyo mosubay og single round-robin format diin ang top four teams moabante sa crossover semifinals. Ang modaog maoy mag-abot sa finals pinasikad sa "best-of-three" series.
Gawas sa tropeyo, ang kampiyon mobulsa og P5,000, mopahiluna sa ikaduha makadawat og P3,000 ug ang ikatulo makaangkon og P2,000.
Ang tinuig nga kompetisyon nga gipasiugdahan sa Mandaue City Cooperative Development Office ubos sa liderato ni City Cooperative Officer ug OIC Asst. City Administrator Atty. Ernesto C. Maringuran, gipaluyohan sa kagamhanan sa siyudad sa Mandaue pinaagi ni Mayor Jonas Cortes. (BANAT NEWS)
- Latest
- Trending
