Casimero milampos

CEBU, Philippines - Gitubag ni Filipino boxing champion Johnriel 'Quadro Alas' Casimero ang hagit dihang iyang nadepensaan ang iyang IBF light flyweight title batok ni Mexican Pedro Guevara pinaagi sa split decision didto balwarte sa Mehikano sa Sinaloa, Mexico.

Usa kini ka dakung kadaugan alang ni Casimero kinsa napilde sa katapusan niyang away didto sa Mexico batok ni Ramon Garcia Hirales duha ka tuig ang milabay alang sa WBO light flyweight belt.

Init ang sinukliay og kumo sa duha ka boksidor, apan mipatigbabaw ang garbo sa Ormoc City nga si Casimero dihang napatumba niya si Guevara sa sayung bahin sa away.

Giusban kini ni Casimero sa tenth round dihang usa ka solidong kombinasyon ang iyang gibuhian aron mapahayang pagbalik si Guevara. Human sa away duha ka hurado ang mihatag og 114-113 ug 116-111 ngadto ni Casimero, samtang usa ka hurado ang miiskor og 114-113 ngadto ni Guevara.

Sa maong kadaugan, si Casimero mipalambo sa iyang record ngadto 17-2-1, 10KOs, samtang si Guevara nakatilaw sa labing una niyang pilde sud sa 20 ka away.

Benedicto hari sa 2012 Ironman Philippines

Ang tindero og ice nga si August Benedicto sa Tarlac maoy mipatigbabaw sa Filipino elite division sa 2012 Ironman 70.3 Philippines kagahapon didto sa Shangri-la Mactan Resort and Spa.

Si Benedicto ang migawas nga labing paspas sa Pinoy category diin gipilde niya ang mga top bet nga sila si 2009 champion Noy Jopson, Arland Macasieb ug Neil Catiil.

Ikasiyam lang si Benedicto atol sa 1.9 kilometer swim, apan nakabawi siya sa bike discipline nga maoy yawi sa iyang kadaugan.

Ang 2007 SEA Games bronze medallist nga si Benedicto, gisundan ni Franklin Penalosa ug Mendel Lopez isip runner-ups. Si Jopson mipahiluna sa fourth ug si Benjamin Rana mipwesto sa ikalima.

Samtang sa laing bahin, ang Australyanong si Pete Jacobs maoy midaog batok sa ubang langyaw nga nangapil.

Wala usab mahimong babag sa usa ray tiil nga swimmer nga si Arnel Aba, bawog og tiil nga cyclist nga si Godfrey Taberna ug usa ray bukton nga si Isidro Vildisola nga humanon ang kompetisyon pinaagi sa paglangkat sa ilang grupong Wetshop tri-team ang ikaduhang pwesto sa oras nga 4:47.35. (LPM/EIM)

Protesta sa ABAP gibasura

Wala hatagi og gibug-aton sa International Boxing Association ang protesta nga gisang-at sa Amateur Boxing Association of the Philippines (ABAP) human sa kontrobersyal nga kapildehan ni Pinoy boxer Mark Anthony Barriga batok ni Kazakhstan Bizhan Zhakypov.

Niadtong Sabado sa gabii, hingpit nga nahanaw ang paglaum sa nasud nga makakuha og medalya human gipilde ni Zhakypov si Barriga sa usa ka sikit nga 16-17, decision. Ang maong duwa napuno sa clinching ug wrestling diin pulos gikuhaan og puntos ang duha ka boksidor.

Sa habig sa ABAP, ilang gireklamo ang headbutt warning sa referee nga nakakuha og dos puntos ni Barriga. Mahinungdanon unta ang maong puntos tungod kay kun wala pa gi-deduct sa referee ang maong puntos, ang Pinoy boxer unta ang moabante sa quarterfinals.

Apan ang International Boxing Association miklaro nga dili nila sayun-sayunon pagbalik ang desisyon bisan pa sa reklamo sa Pilipinas, apan ilang gipasalig nga mohimo sila og review sa maong away.

Si Zhakypov ang miabante sa quarterfinals diin sangkaon niini ang Tsino nga si Zou Shiming. (LPM gikan sa Philstar)