Gesta mo-KO ni Barnett

CEBU, Philippines - "Knockout" maoy tuyo ug tumong ni undefeated lightweight contender Mercito 'No Mercy' Gesta (25-0, 13KOs) sa iyang pakigsangka ni American boxer Ty Barnett (20-2-1, 13KOs) sa main event sa ESPN2: Friday Night Fights didto sa Texas Station Casino sa Las Vegas, Nevada.

Determinado si Gesta nga motumba ni Barnett, kinsa kapila na mipadangat og mga ngil-ad nga pamahayag batok sa Pinoy'ng boksidor.

Ang amahan ug trainer ni Gesta nga si Anecito nagkanayon nga ipakita karon sa iyang anak ang kaagresibo sukwahi sa nangaging mga away niini.

Labaw sa tanan, nagpanikad na karon ang 24-anyos nga si Gesta nga mohimo og "knockout."

"Daghan og gipang-estorya si Barnett nga nakapalagot ni Mercito, nindot kay mas agresibo karon akong anak," matud pa ni Anecito. "Nakita namo nga mapatumba ni Mercito si Barnett sud sa lima ka rounds."

Atol sa official weigh-in kagahapon, si Gesta mitimbang og 137 pounds, labaw og duha ka libras ni Barnett.

Nagtuo si Gesta nga ang kadaugan batok ni Barnett makalamdag gidamgo niyang world title fight.

Ang garbo sa Brgy. Labogon, Mandaue nga si Gesta lab-as pa sa iyang eight-round TKO nga kadaugan batok ni Colombian Oscar Cuero niadtong Abril 14 didto sa Mandalay Bay Resort and Casino sa Las Vegas.