Jaguars naka-eskapo sa Warriors sa 12th CESAFI

CEBU, Philippines - Nakaipsot ang University of San Jose-Recoletos (USJ-R) Jaguars gikan sa higpit nga depensa sa University of San Carlos (USC) Warriors bitbit ang 82-78 nga kadaugan sa 12th Cebu Schools Athletic Foundation Inc. (CESAFI) basketball event niadtong Domingo sa gabii didto sa Cebu Coliseum.

Si Abulaiz Suliman gawas nga siya'y nangulo sa opensiba, siya usab ang miagak sa Jaguars aron pagseguro nga dili kini mokolapso.

Mihabwa og 21 puntos si Suliman ug si Miguel Tabaloc mikandos og 15 puntos, apan ang mga baskets ni Matthew Parker maoy nakatabang og daku sa pagpadaog sa Jaguars. 

Ang Chinese-American nga si Stephen Que maoy nangulo sa pilderong Warriors nga mitira og 17 puntos, gisundan nilang   Nilton John Otida ug Charles Pepito nga mikimada og 13 puntos matag usa. Sila si Chino Uy ug Cantonao parehong miiskor og 11 puntos alang sa maong kapildihan.  (BANAT SPORTS)