Sukmagay sa J centre mall karong gabii

CEBU, Philippines - Magsinukliay na og kumo   sila si Philippine No. 1 light flyweight contender Vergilio 'Maton' Silvano (11-2, 6KOs) ug Charlie 'Steelbar' Cabilla (12-10, 2KOs) alang sa PBF title sa main event sa "Fight Fury I" karong gabii didto sa J Centre Convention Hall sa Mandaue City.

Ang garbo sa Dalaguete, Cebu nga si Silvano nga nahimong sparring partner ni IBF light flyweight champion Johnriel Casimero, mosuway pagkulit sa ika-11 niyang sunod-sunod nga daog batok sa taga-Bukidnon nga si Cabilla.

"Nag-train ko og maayo tungod kay gusto nako makuha ang bakus," matud pa sa Omega Boxing Stable fighter nga si Silvano. "Pareha ming duha nga kusog og kumo ug paningkamutan nako nga makahimo og knockout."

Sa iyang bahin, gamiton ni Cabilla ang iyang kasinatian batok sa inilog nga si Silvano. Bisan og napakyas siya sa miagi niyang away batok ni ALA boxer Jerson Mancio sa ilang Philippine light flyweight title, masaligon gihapon si Cabilla nga modaog.

Sa supporting main event sa boxing card nga gipasiugdahan sa Omega Pro ug ni Thai boxing patron Naris Singwangcha, si Jason Canoy sa Omega Stable makigharong ni Ryan Bongcawil sa Bukidnon.

Moaway usab si undefeated Jack 'Golden Boy' Tepora batok ni JR Salvador sa Phil-Australia Boxing Club (PABC).

Mokompleto sa fight card mao ang sangka nila ni Jordan Catubay batok Anthony Galigao, Jhaleel Payao batok Rommel Bangirigo ug Charlie Pucdol batok Jerome Casas.  (BANAT SPORTS)