Gesta misaad og knockout

CEBU, Philippines - Determinado si undefeated lightweight prospect Mercito 'No Mercy' Gesta nga modaog pinaagi sa knockout sa iyang away batok ni American boxer Ty Barnett sa Agosto 3 didto sa Texas Station Casino sa Las Vegas.

Gusto ni Gesta nga iyang pildihon si Barnett aron mohilom na kini ug dili na mobuhi og ngil-ad nga mga pulong.

Sa iyang mga pamahayag nga migawas sa internet, si Barnett wala mosalig sa kusog ni Gesta ug gipakapinan pa sa pag-ingon nga "overrated" boxer.

"Daghan siya og gi-estorya nga nakapalagot ni Mercito," matud pa sa amahan ug trainer ni Gesta nga si Anecito. "Pero nindot ni kay nagpaila lang kini nga isog ang Amerikano, hinaot di siya modagan ug makig 'bell-to-bell' siya sa akong anak."

Si Mercito anaa na sa katapusang hugna sa iyang ensayo didto sa Las Vegas uban ni US based Filipino trainer Vince Parra.

Ang garbo sa Brgy. Labogon, Mandaue City nga si Gesta nagbitbit og rekord nga 25-0, 13KOs, samtang si Barnett adunay 20-1, 13KOs record.  (BANAT SPORTS)