Mas nindot torneyo sa SHAABAA karon

CEBU, Philippines - Mipasalig ang bag-ong presidente sa Sacred Heart Ateneo Alumni Basketball Athletic Association (SHAABAA) nga si Marcelino Co, tag-iya sa Twin Tower Farms nga mas "competitive" ang ilang torneyo karong tuiga nga sugdan karong Domingo didto sa Sacred Heart-Ateneo de Cebu (SHS-AdC) sa Brgy. Canduman, Mandaue City.

Dose ka teams ang mosalmot sa maong torneyo nga sugdan sa alas-2 sa hapon human sa   opening ceremony.

Si Co maoy mipuli kang immediate past president Reagan King sa RDAK.

Gawas sa Twin Tower Farms Blue, Twin Tower Farms Gold ug RDAK, ang ubang teams nga mosalmot karong tuiga mao ang defending champion Dynamic Power, Goldberry Suites and Hotel, A Team, Cebu Landmasters, Fiesta Cebuana, Insular Square, JAPFA, Gaisano Capital ug Faculty/Teachers.

Sama sa gihapon, ang duwa sa matag Domingo adto himuon sa Canduman school campus ug ang duwa matag Huwebes anha sa ilang karaang campus sa Mango Avenue.

Sila si Co, King uban pang opisyales ug mga players sa SHAABAA maoy mga dinapit   kagahapon atol sa senemanang SCOOP Sports Forum ni Bobby Inoferio.

"The alumni are very passionate about the sports, we love playing basketball. We are hoping for another exciting year for SHAABAA," matud pa ni King.Sa iyang bahin, si Co miingon nga mas nindot ang ilang torneyo karong tuiga. "We have more competitive tournament this year. Weaker teams merged in order to be more stronger and competitive."

Ubos sa liderato ni Co, ila sab nahuna-hunaan ang pagpahigayon og bowling, billiards ug badminton tournaments.

Ang top eight maoy mo-abante sa semifinals diin ang top four makabaton og twice-to-beat advantage. Ang semifinals himuon nga best-of-three series ug ingon man usab ang finals.

Sa laing bahin, adunay pagahimuon nga St. Ignatius Run 2012 nga gipaluyohan sab sa Ateneo alumni ug sa mga sakop sa SHAABAA.

Ang maong fun run himuon karong Hulyo 28 didto sa Insular Square grounds.

Ang lumba gibahin sa 16K, 6K ug 3K categories.

Ang 3K category alang lang sa mga SHS-AdC alumni, mga estudyante, ginikanan ug sakop sa faculty ug mgac staff. Ang 6K ug 16K bukas sa tanan, apan walay apil ang mga Kenyan runners. 

Ganting salapi ang maangkon sa mga mananaog sa matag dibisyon. 

Ang maong proyekto usa ka fund-raising campaign diin ang matigom nga salapi ila itabang sa alumni lakip niini ang Gawad Kalinga nga usa ka pagtinabangay ug pagtukod og balay alang niadtong mga kabus.

Ang registration fee nagkantidad og P450 sa 16K, P350 sa 6K ug P300 sa 3K run. Libre na niini ang singlets.  (BANAT SPORTS)