OZ Racing pasiugda'g downhill race

CEBU, Philippines - Nangandam na ang mga Sugbuanong downhillers alang sa OZ Racing Mountainbike-Downhill Race nga gikatakda sa Agosto 4 didto sa Valencia, Negros Oriental.

Ang big boss sa OZ Racing nga si Zandro Fajardo ug iyang prized ward nga si JR Barba maoy mangulo sa kampanya sa mga Sugbuanon ning usa ka adlaw nga kompetisyon. Sila si Fajardo ug Barba bag-o lang nisalmot sa Singapore National Cycling Championships sa miaging semana.

Ang pagsuporta ni Fajardo sa maong kalihukan kabahin sa pagpangandam sa Sugbuanong riders alang sa 1st COMBAT Round 3-D.R.O.P National Series sunod bulan didto sa Cagayan de Oro City.

Gumikan kay usa lang kini ka tune-up alang sa nasudnong kompetisyon, ang organizers mihukom nga bahinon ang mga partisipante pinasikad sa ilang edad ug dili ang naandan nga mga kategoriya nga gibasi sa katakus sa mga riders.

Ang age group nga tigian mao ang 29-under ug 30-above.

Aduna kini registration fee nga P300.    (BANAT SPORTS)