PHL ESKRIMADORS nagpanikad na

CEBU, Philippines - Nanghinaot ang mga Pinoy'ng eskrimadors nga makapahimos og maayo sa ilang "homecourt advantage" sa tinguha nga langkaton og balik ang kampiyonato sa 12th World Eskrima Kali Arnis Federation (WEKAF) Championship and Congress nga gikatakda karong Hulyo 18-24 diha sa Cebu International Convention Center (CICC) sa Mandaue City.

Ang Pilipinas katapusang nanghawod sa labing daku ug labing prestihiyoso nga torneyo sa arnis lukop kalibutan niadto pang tuig 2000.

Sa dihang ang nasud maoy mi-host sa maong kalihukan upat na ka tuig ang milabay didto sa Ayala Center Cebu, ang Team Phl hapit misakmit sa korona ug napilde kini og usa lamang ka lugas sa bulawan sa Amerika.

Sa miaging edisyon sa maong torneyo nga gipahigayon didto sa Mexico niadtong 2010, ang Pilipinas mipadala lamang og 13 ka atleta nga mikabkab og unom ka bulawan.

Ning higayona nga ang nasud na sab maoy gitahasan pagpahigayon sa maong kompetisyon nga himuon kausa lamang matag duha ka tuig, si WEKAF President Master Gerald Cañete masaligon nga buk-on sa Pilipinas ang nagkadinang 12 ka tuig niining pagkauhaw sa gikaintapang overall title gumikan sa hugtanon ug makuti nga preparasyon sa mga Pinoy arnisadors.

"This time we made a lot of preparations. The composition of the Philippine team is now broader because our players went through an extensive selection process. We're training the guys hard and we will try our best to win the overall championship," matud pa ni Master Gerald Cañete.

"I would like the Cebuanos to come and support this event. This is our own martial art and it's the biggest gathering of the top eskrimadors all over the world. This is something that we can truly be proud of," dugang pa ni Master Gerald.

Ang amahan ni Gerald nga si WEKAF Chairman Emeritus ug Supreme Grandmaster Dionisio Cañete usa sa 20 ka mga eskrima grandmasters nga ibayaw sa Hall of Fame nga mahitabo sa labing unang higayon sa 23 na ka tuig nga kasaysayan sa WEKAF.

Ang enshrinement ceremony ipahigayon dungan sa pagbendisyon ug pormal nga inagurasyon sa Eskrima Temple karong Hulyo 18 didto sa Doce Pares Mountain Training Park sa Brgy. Malubog, ning dakbayan. Mao kini ang ikaduhang templo sa martial arts dinhi sa Asya sunod sa Kung Fu Temple sa China.

Sa lain pang unang panghitabo sa WEKAF, usa ka Head of State ang motuyo'g anhi dinhi aron pagsaksi sa maong usa ka semana nga kalihukan.

Kini walay lain kun di si Honorable Didier Robert, ang presidente sa Reunion Island didto sa France.

Sa laing bahin, ang WEKAF Congress gikatakda karong Hulyo 19 didto sa Marco Polo Plaza Hotel diin si Philippine Sports Commission (PSC) chairman Ritchie Garcia maoy keynote speaker.

Moabot ngadto sa 700 eskrimadors gikan sa 29 ka nasud sa tibuok kalibutan ang maghugop dinhi sa Sugbu alang sa maong torneyo.

Gawas sa Pilipinas ug Amerika, lain pang mga partisipanteng nasud mao ang France, Oman, Iran, Scotland, Ireland, England, Spain, Puerto Rico, Canada, Belgium, Germany, Norway, Hong Kong, Hungary, Lichtenstein, Switzerland, Australia, New Zealand, India, Greece, South Korea, Vietnam, Sweden, Poland, Portugal, South Africa ug Indonesia. - BANAT NEWS