Red hari sa Marco Polo sportsfest

CEBU, Philippines - Gilangkat sa Red team ang overall championship sa labing unang Marco Polo Plaza Cebu Inter-color Sportsfest niadtong weekend.

Sa kinatibuk-an, ang Red nakakuha og 140 puntos ug naka-gold sa basketball event.

Ila usab nga gisakmit ang korona sa women's badminton ug volleyball events.

Ang Red team nga maayo sab sa arm wrestling ug fun run, nidaog sa best booth award aron makatigom og dugang puntos.

Ang Green team sikit nga mipahiluna sa ikaduha uban ang 135 puntos.

Numero uno sila sa men's singles ug mixed doubles sa badminton ug ingon man sa men's darts.

Ang Blue team nga nidominar sa men's volleyball, mi-okupar sa ikatulong dapit sa ilang 110 puntos, gisundan sa Yellow nga adunay 82.5 puntos.

Ang mga resulta gipadala ngadto sa The Freeman, ang igsuong mantalaan sa Banat News ni Marco Polo Human Resources Manager Menie Toledo pinaagi sa ilang sales executive Janice Jacaban-Magsumbol.

Gawas sa pag-promote og healthy lifestyle, ang maong sportsfest magsilbe usab nga team building activity alang sa mga kawani sa nahisgutang hotel. - BANAT NEWS