Park 'N Go vs. Water Market

CEBU, Philippines - Pagkaon batok tubig maoy magbagat alang sa Power Forty President's Cup basketball league finals sunod semana.

Hingpit nang mi-abante sa finals ang Park 'N Go Bakeshop ni Power Forty president Romy Rama dihang ilang gilubong ang UTASSCO, 111-98 samtang gilumsan sa Water Market ang Ang Tibay Mo, 136-93 sa kataposang adlaw sa semifinals sa Power Forty kaniadtong Martes didto sa Inayawan Sports Complex.

Ang 136 puntos nga nakuha sa Water Market maoy usa sa labing dakung iskor sa torneyo karong tuiga diin lima kanila ang mibahug ug double figures.

Si Michael Arias maoy nangu sa Water Market sa iyang 38 puntos ug si team owner Vez Eleguin midugang og 28 puntos.

Si Fernando Sumargo mihakot og 30 puntos aron pangulohan ang Ang Tibay Mo.

Sa laing bahin, lima sab ka players sa Park 'N Go ang miposa og double figures pinangulohan ni Wilbur Cabrera sa iyang 32 puntos.

Si Alex Mercado maoy nangu sa UTASSCO sa iyang 24 puntos samtang sila si Teddy Ebrado ug team owner Atty. Flor Yosores midugang og 18 ug 17 puntos matag usa.

Ang UTASSCO ug Ang Tibay Mo maoy magbagat alang sa ikatulong pwesto.

Puntos matag usa:

First Game:

Water Market (136)— Arias 38, Eleguin 28, Lim 22, Libre 18, Mosqueda 12, Balbanera 8, Labajo 6, Ozon 4

Ang Tibay Mo (93)— Sumargo 30, Abasolo 20, Gaviola 20, Mabalcon 13, Samson 6, Gabuya 4

Second Game:

Park'N Go (111)— Cabrera 32, Abatayo 21, Tabar 18, J. Rama 10, Fuentes 10, Misa 8, Lisondra 8, R. Rama 2, Espinosa 2, G. Rama 2

UTASSCO (98)—  Mercado 24, Ebrado 18, F. Yosores 17, Nacional 12, Veloso 11, Echavez 8, Nunez 4, Yu 2, Yosores 2. - BANAT NEWS