CEBU, Philippines - Ang duathlete nga si Warren Vinan mao ang nanghawod sa premier division sa 1st Cambitas Bike Challenge cross-country competition sa miaging adlaw didto sa Cambitas Bike Park sa Babag II, ning siyudad.
Gitapos ni Vinan ang lumba sud lang sa 45 minutos ug 48.80 segundos. Nagsunod si Jair Buhi-an sa oras nga 46:19.91, samtang si I-K Robles mipahiluna sa ikatulo sa iyang 53:04.63.
Sa 35-up class, si Jonasis Alicaway milupig ni Joseph Carcueba sa oras nga 21:24.90, samtang ang nauwahi mihuman sa lumba sa oras nga 21:25.57.
Si Orville Tecson maoy naghari sa 35-up class sa oras nga 22:39, gisundan nila ni Wendel Valeriano (27:29.92) ug Juncel Gapay (29:48.27).
Ang top three finishers sa beginner's division mao sila si Roger Niere (21:09.82), Christian Cabonita (22:25.40) ug Brian Demetria (23:13.02). (BANAT SPORTS)