MANILA, Philippines - Kaagad na magdedepensa ng kanilang korona ang Petron Blaze sa pagsagupa sa Powerade sa pagsisimula ng 2012 PBA Governors Cup bukas sa Ynares Sports Center sa Antipolo City.
Magtatapat ang Boosters at ang Tigers sa alas-6:30 ng gabi matapos ang salpukan ng Rain or Shine Elasto Painters at Alaska Aces sa alas-4:15 ng hapon.
Itatampok ng Petron Blaze, tinalo ang Talk ‘N Text sa championship series ng 2011 PBA Governors Cup, si import Eddie Basden at ang muling paglalaro nina Jay Washington, Dondon Hontiveros at rookie Chris Lutz.
Nakita ang 29-anyos at 6-foot-5 na si Basden sa 19 laro para sa Chicago Bulls noong 2005-06 NBA season kung saan siya nagtala ng average na 2.1 points per game.
Nahugot rin ng Petron sina rookie Fil-Am Marcio Lassiter at 6’6 center Dorian Peña mula sa Powerade at Barako Bull, ayon sa pagkakasunod, sa pamamagitan ng trade.
Kaugnay nito, ipaparada naman ng Meralco si Juan Patillo, naging kakampi ni Los Angeles Clippers superstar Blake Griffin sa University of Oklahoma noong 2008-09 varsity season at kumampanya sa NBA D-League para sa Bakesfield Jam.
Ang 24-anyos na si Patillo ang ikatlong import na hinugot ng Bolts matapos magkaroon ng injury si Tim Pickett at bumagsak sa height requirement na 6’5 si Devin Green.
Samantala, isang 16-man PBA selection na gagabayan ni B-Meg coach Tim Cone ang makakaharap ng Shanghai Sharks sa isang goodwill game sa Hunyo 28 sa MOA Arena sa Pasay City.
Ang Shanghai Sharks ay kasalukuyang No. 6 sa Chinese Basketball Association.