Blackwater, RnW pupuwesto na

MANILA, Philippines - Aasinta ng mga panalo ang Blackwater Sports at RnW Pacific Pipes para ma­­katiyak ng puwesto sa quarterfinals sa pagpa­patuloy ngayon ng PBA D-League Foundation Cup sa San Juan Gym.

Parehong may 4-3 kar­ta at magkasalo sa ikaapat at limang puwesto, ang Elite ay makikipagsuntukan sa Cagayan Rising Suns sa ganap na alas-2 ng ha­pon bago sumunod ang bakbakan sa pagitan ng Steel Masters at Jr. Po­werade dakong alas-4.

Ang Elite at Steel Masters ay parehong papasok sa laro mula sa di magandang pagkatalo na nagla­gay ng dagok sa paghaha­bol sa awtomatikong puwesto sa semifinals.

Bumulagta ang tropa ni coach Leo Isaac nang kinaharap ang mga malalakas na koponan ng Cebuana Lhuillier (84-101) at NLEX Road Warriors (45-60) habang ang mga alipores ni coach Alfredo Jarencio ay dumapa sa Gems (86-100).

Nananalig ang mga panatiko ng Elite na manu­numbalik ang sigla ng ko­ponan dahil hindi nila ma­aaring biruin ang Suns na naghahabol pa rin ng unang panalo matapos ang walong laro.

Tulad ng Suns, talsik na ang Tigers sa 2-6 baraha pero lalaban pa rin ang mga ito para magkaroon ng disenteng pagtatapos ang ginawang kampanya sa liga.