San Marino nidaog na gyud

CEBU, Philippines - Sa katapusan, mikulit sa labing una nilang daog ang San Marino Corned Tuna/USPF Panthers human maka-eskapo batok sa Kia Motors/CIT-U Wildcats, 77-74 kagabii sa 6th CESAFI Partner's Cup didto sa Cebu Coliseum.

Maayo kaayong nakaduwa ang San Marino ubos sa liderato ni Brylle Meca aron moposte og 43-30 nga bentaha sa nahabiling 6:54 sa third period. Apan nahilis dayon ang maong labaw dihang si Nady Banate nakahimo og daghang fouls nga nakahigayon sa Kia Motors pagratsada gamit ang 14-0 run aron sakmiton ang labaw, 54-53 sa basket ni Jeffrey Taghoy.

Nameligro ang sitwasyon sa San Marino dihang na-disqualify si Banate sa nanghinapos nga bahin sa third quarter nga nakapugos sa San Marino pagduwa nga may upat lang ka players diin ang torneyo nagtugot sa usa ka team sa pagpaduwa og labing daghan lima ka players matag usa alang sa unang tulo ka kuwarter.

Nakatabla ang San Marino, 55-all human sa buzzer beater drive ni Joshua Corcilles sa third period. Miaksiyon na usab og takilid ang San Marino sa final period, apan nakahimo gihapon sila sa pagrekober aron pagkulit og daog.

Si Meca maoy bugtong player sa San Marino nga miiskor og double figures pinaagi sa iyang 12 puntos. (BANAT SPORTS)