CEBU, Philippines - Gipadayon ni Filipino lightweight prospect Mercito "No Mercy" Gesta ang iyang pagsulbong ngadto sa damgo niya nga world title shot dihang iyang gi-TKO sa round 8 ang Colombian nga si Oscar Cuero kagahapon didto sa Mandalay Bay sa Las Vegas.
Ang garbo sa Brgy. Labogon sa Mandaue City mipakita sa iyang kusug dihang gibombahan niya si Cuero kinsa unang miluhod sa round 7 human sa nagpungasing bodyshot gikan ni Gesta.
Nakita ang kusug ni Gesta sa sayung bahin palang sa away nga maoy nakapaaghat ni Cuero nga magpanunay og panggakos sa Sugbuanong boksidor. Tungod niini napugos si referee Robert Byrd nga pahamtangan og one-point deduction ang Colombian boxer.
Pag-abot sa eight round, wala na hatagi pa ni Gesta nga makabawi si Cuero dihang iya kining gipaspasan og kulata si Cuero kinsa wala na makaantos ug napugos pagsurender sa nahibiling 1:38 sa maong round.
Sa maong kadaugan si Gesta (25-0, 13KOs) posible nga mahatagan og dagkung away sa Top Rank Inc. diin mismo ang bigboss nga si Bob Arum ang mihulagway ni Gesta nga umaabot nga Pinoy boxing superstar. - (BANAT NEWS)