CEBU, Philippines - Mimartsa ngadto sa ‘Final Four’ ang Barako Bull Energy dihang ilang gitagak ang Alaska Aces, 106-85, sa Game-3 sa ilang ‘best-of-three’ quarterfinals series kagabii sa PBA Commissioner’s Cup didto sa Smart Araneta Coliseum.
Sa maong kadaugan ang Barako Bull maoy nakakuha og katungod nga moatubang ugma sa reigning All-Filipino Cup champion Talk N’ Text Tropang Texters sa usa ka ‘best-of-five’ semifinals series.
Bisan pa og beterano ang kasagaran sa ilang mga player ug anaa usab nila ang labing mubo nga import sa torneyo, gipakita sa Barako Bull ang ilang kamangtas dihang dali nilang gilubong ang Alaska sa first half, 55-42.
Batok sa 7-footer nga import sa Alaska nga si Adam Parada, mipugnit og 32 puntos ang kanhi ‘best import’ sa PBA nga si Gabe Freeman uban ang 19 ka rebounds aron pangulohan ang Barako.
Gawas ni Freeman, mipakita usab og nindotf nga duwa alang sa Barako si Ronald Tubid kinsa miposa og 20 puntos, samtang ang kanhi two-time MVP nga si Willie Miller mitira og 18 puntos.
Gibiyaan sa Barako ang Alaska sa tibuok duwa ug girehistro nila ang 20 puntos nga labaw sa katapusang 8:03 sa duwa, 89-69.
Pacquiao sa ‘Hennesy’ ads
Mogawas sa usa ka commercial sa sikat nga ilimnon nga Hennessy Cognac ang Pinoy boxing superstar nga si Manny Pacquiao.
Ang maong advertisement sa Hennessy nga gibidahan ni Pacquiao gipaabot nga makita sa tibuok kalibutan.
Negosasyon gisugdan na
Gisugdan na ang negosasyon alang sa gipaabot nga title fight alang ni Filipino boxer Sylvester Lopez batok ni WBC super flyweight silver champion Yota Sato.
Si Lopez adunay record nga 19-3, 15KOs, samtang si Sato adunay 24-1, 12KOs.
Cousins Gipamulta $25,000
Gisagpa og multa nga $25,000 ang sentro sa Sacramento Kings nga si DeMarcus Cousins.
Kini human iyang gipasanginlan ang mga referee nga midapig sa Los Angeles Clippers atol sa ilang kapildehan.
‘Iceman’ way gipaboran
Nagtuo si kanhi UFC light heavyweight champion Chuck ‘Iceman’ Liddell nga patas ra ang abilidad nila ni Jon Jones ug Rashad Evans kinsa mag-ilog sa UFC title.
Si Jones modepensa sa light heavyweight belt batok sa beteranong si Evans sa Abril 22 sa UFC 145. - BANAT NEWS