Gesta misaad og K.O.

CEBU, Philippines - Gipasalig ni undefeated lightweight contender Mercito 'No Mercy' Gesta (24-0, 12KOs) nga modaog pinaagi sa "knockout" batok ni Oscar Cuero (15-7, 12KOs) sa Abril 14 didto sa Mandalay Bay Resort and Casino sa Las Vegas, Nevada.

Ang Gesta-Cuero bout, usa sa undercard sa WBA lightweight championship showdown tali ni Brandon Rios-Richard Abril.

Si Gesta gihulagway kaniadto ni Top Rank Inc. CEO Bob Arum nga usa sa mga sumusunod ni Manny Pacquiao. Lab-as pa sa panumduman ni Gesta ang iyang "unanimous decision" nga kadaugan batok ni Mexican Ricardo Dominguez niadtong Nobiyembre sa miaging tuig didto sa Las Vegas.

Si Gesta uban ang iyang amahan nga si Anecito ug US-based Filipino trainer nga si Vince Parra atua na karon didto sa Las Vegas alang sa katapusang preparasyon sa dili pa ang away.

"Andam nami, nag-train mi og duha ka buwan para ani nga fight ug akong nakita tumbahon sa akong anak (Mercito) si Cuero," matud pa ni Anecito. "Di moabot og 10 rounds si Cuero tungod kay kusog kaayo ang kumo ni Mercito ug dagku iyang mga gika-sparring sa gym."

Ang garbo sa Brgy. Labogon sa Mandaue City usa karon sa mga gisaytan nga iparang ni three-division Mexican champion Juan Manuel Marquez sa Hulyo. (BANATNEWS)