Layo na naabtan sa Philippine Azkals
Layo na kaayo ang naabot sa atong football team nga Philippine Azkals bisan pa man nga napilde sa ‘makalagot’ nga sitwasyon batok sa Turkmenistan, 2-1 niadtong Biyernes didto sa Kathmandu, Nepal.
Sa tinuod lang, sakit baya hisgutan, apan alang sa kaayohan ug impormasyon sa tanan, kinahanglan natong tukion ang maong kapildihan ug kun unsay epekto niini sa atong batan-ong team sa international arena. Dili tiaw ang naabot sa Azkals gikan sa ilang pagsugod hangtod karong nakasulod gyud sila sa semis sa 2012 AFC Challenge Cup bisan og fighting for third na lang sila batok sa mapilde tali sa North Korea ug Palestine ugmang adlawa.
Sa pagduwa pa lang sa Azkals niadtong Biyernes, kuwang na sila og tulo ka mga lig-ong players nga sila si James Younghusband, Angel Guirado ug Jason Sabio. Sila si Guirado ug Younghusband wala makaduwa tungod sa ilang yellow cards atol sa ilang 2-1 nga kadaugan batok sa Tajikistan, samtang si Sabio adunay injury. Dili sa ingon nga daghan kitang "excuses" kay napildi man, pero daku gyud og ikatabang ang tulo sa opensa ug depensa. Si Guirado usa sa mga sinaligan sa opensa, samtang sila si Younghusband ug Sabio susama usab og kapabilidad.
Kun nakasulod pa kita sa finals, labaw unta ta og usa ka tikang sa kasamtangang nakab-ot na sa Azkals karon. Hinuon daku ang pagsalig nga ang duha nato ka daog batok sa Tajikistan ug India maka-improve sa atong world ranking sa FIFA.
Sa pagka karon, ang Pilipinas naa sa 156th sa FIFA World ranking sa labing uwahing gipagawas nilang ranking karong bulana. Ang Tajikistan 145th, Turkmenistan 168th, India 158th, ug ang duha ka posibleng makaatbang sa Azkals ugmang adlawa nga North Korea 111th ug ang Palestine 160th .
Daku akong pagtuo nga posibleng mosaka kita og duha ka ang-ang human niining AFC Challenge Cup kun adunay ranking sa mosunod nga mga bulan.
* * *
Ang Yaw-Yan Ardigma Martial Arts Federation Inc. adunay gitak-ang nga init ug nagpanikad nga Ground and Pound VI-Invincible diin mga propesyunal nga mga mixed martial artist ang magpinaksitay.
Ang maong torneyo nga gipasiugdahan ni Master Ekin Caniga Jr. anha himuon sa New Cebu Coliseum sa Hulyo 14 ning tuiga. Lakip sa moapil nga mga martial arts clubs/teams gikan sa Yaw-Yan Ardigma-Cebu City; Yaw-Yan Musang sa Lapulapu City; Durex Dragon Kickboxing Club sa Lapulapu City; Soma Kickboxing Club sa Mandaue City; Negros Top Team sa Dumaguete City; Tenbudo MMA sa Malaysia; Butuan Extreme sa Butuan City ug Muma Kickboxing Club sa Cagayan de Oro City.
* * *
Nagsugod na usab og panawat ang Yaw-Yan Ardigma alang sa ilang summer clinic diha sa ilang headquarters sa 4th Floor sa Coastal Pacific Downtown Center sa dalan sa Sancianko, Cebu City.
Mga kurso nga itudlo sa summer classes naglakip sa arnis, boxing, Yaw-Yan Combat (self defense), Yaw-Yan Ardigma System ug Mixed Martial Arts. Gibahin kini sa duha ka batches. Ang unang grupo sugdan sa Abril 2 ug ang ikaduha sa Mayo 2. Alang niadtong interesadong makat-on, mahimong motawag/text sa numero 0932-4524999.
* * *
GREETINGS. Akong i-greet akong daughter nga si Zoe Alexis Montaño Melecio sa iyang 9th birthday karong adlawa. Belated happy birthday pud diay sa akong anak nga si Zion Alexander sa iyang birthday niadtong Marso 7. Ug advance happy birthday pud kang Kezy Mae Alivio nga mag-debut ugmang adlawa, apan karong adlawa ang happy-happy.
PAGTULON-AN: Lisud nga kaaway ang imong kaugalingon. Pamalandongi ang kaugalingon kun sa unsa nay naabot nimo karon sa kinaiyang naa nimo.
- Latest
- Trending
